उपराष्ट्रपति यादव र बङ्गलादेशी कार्यवाहक राजदूतबीच द्विपक्षीय सम्बन्धका विविध आयामबारे छलफल

काठमाडौं । उपराष्ट्रपति रामसहायप्रसाद यादवसँग नेपालस्थित बङ्गलादेशी दूतावासका कार्यवाहक राजदूत मोहम्मद हुमायूँ कबीरले बिहीबार भेट गरेका छन् ।

लैनचारस्थित उपराष्ट्रपतिको कार्यालयमा भएको भेटमा उनीहरूबीच दुई मुलुकबीचको द्विपक्षीय सम्बन्धका विविध आयामबारे छलफल भएको उपराष्ट्रपतिको सचिवालयले जनाएको छ ।

सो अवसरमा उपराष्ट्रपति यादवले नेपाल र बङ्गलादेशबीच सन् १९७१ मा बङ्गलादेश स्वतन्त्र राष्ट्रको रूपमा स्थापना भएदेखि नै मैत्रीपूर्ण र सद्भावपूर्ण सम्बन्ध कायम रहेको बताए ।

‘दुई देशबीच उच्चस्तरीय भ्रमणहरूको आदानप्रदान, द्विपक्षीय संयन्त्र र बैठकहरूले द्विपक्षीय सम्बन्धलाई थप सुदृढ बनाउन महत्त्वपूर्ण भूमिका निर्वाह गरेको छ,’ उनले भने, ‘हाम्रो दुई देशबीचको व्यापार पछिल्ला वर्षहरूमा वृद्धि भएको र थप व्यापार विस्तार र विविधीकरण गर्न सक्नुपर्दछ ।’

सो अवसरमा कार्यवाहक राजदूत कबीरले नेपाल र बङ्गलादेशबीचको सम्बन्ध गहिरो रहेको उल्लेख गर्दै दुई देशले पर्यटन विकासमा जोड दिनुपर्ने बताए । ‘नेपालसँग सगरमाथा छ, बङ्गलादेशसँग ‘सी बिच’ छ, जुन पर्यटनको आकर्षणको केन्द्र बन्न सक्छ,’ उनले भने, ‘हरेक वर्ष ४० हजार बङ्गलादेशी नागरिकले नेपाल भ्रमण गर्छन्, यसलाई बढाउन सकिन्छ ।’