छुटेलगत्तै फेरि पक्राउ परे युनुस अन्सारी

काठमाडौं । नक्कली मुद्राको कसुरमा सजाय सकेर कारागारबाट मुक्त भएलगत्तै युनुस अन्सारी फेरि पक्राउ परेका छन् । उनी सजाय भुक्तान गरी शनिबार साँझ नख्खु कारागारबाट मुक्त भएका थिए । लगत्तै प्रहरीको केन्द्रीय अनुसन्धान ब्युरो (सीआईबी) ले पक्राउ गरेको हो ।

उनलाई सम्पत्ति शुद्धीकरणको मुद्दामा पक्राउ गरिएको सीआईबीका प्रवक्ता होबिन्द्र बोगटीले जानकारी दिए । उनले भने, ‘उनको सम्पत्ति शुद्धीकरणको मुद्दा चलिरहेको थियो । नक्कली मुद्राको कसुरमा सजाय भुक्तानपछि छुटेपछि हामीले पक्राउ गरेका हौँ ।’ उनले जिल्ला अदालत काठमाडौंबाट पाँच दिनको म्याद थपिएको समेत बताए । अन्सारी अहिले सीआईबीको हिरासतमा छन् ।