बाढीले कोशी राजमार्गको १०० मिटर सडक बगायो, धनकुटासँगै पहाडी क्षेत्रको यातायात अवरुद्ध

काठमाडौं । बाढीले कोशी राजमार्गको करिब १०० मिटर सडक बगाएपछि पहाडी क्षेत्रको यातायात अवरुद्ध भएको छ ।

लेउती खोलामा आएको बाढीले कोशी लोकमार्गअन्तर्गत धनकुटाको साँगुरीगढी गाउँपालिका– ६ फेदीमा सडक बगाएपछि यातायात अवरुद्ध भएको जिल्ला प्रहरी कार्यालय, धनकुटाले जनाएको छ ।

राजमार्ग भत्किँदा धनकुटासँगै तेह्रथुमलगायत पहाडी जिल्लाको यातायात अवरुद्ध भएको धनकुटा प्रहरीका प्रवक्ता प्रहरी निरीक्षक ध्रुवनारायण श्रेष्ठले बताए ।

‘शनिबार बिहान करिब ५ बजे लेउती खोलामा आएको बाढीले फेदी भन्ने स्थानमा कोशी राजमार्गको करिब १०० मिटर सडक खण्ड कटानगरी बगाएको छ । यसले गर्दा पहाडी क्षेत्रको यातायात अवरुद्ध छ,’ उनले नेपालभ्युजसँग भने ।