लिङ्देनको चेतावनी : कमल थापालाई स-सम्मान रिहा नगरे झनै सशक्त आन्दोलन हुन्छ

काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले आफूहरूको शान्तिपूर्ण आन्दोलनमा प्रहरीले दमन गरेको बताएका छन् ।

नारायणचौरमा राजसंस्था पक्षधरको आन्दोलनलाई सम्बोधन गर्दै उनले आफूहरूको भद्रतालाई कमजोर ठान्ने प्रयास नगर्न सरकारलाई आग्रह गरे ।

लिङ्देनले पक्राउ परेका राप्रपा नेपालका अध्यक्ष कमल थापालाई स–सम्मान रिहाइ नगरे सोमबारबाट झनै सशक्त आन्दोलन गर्ने चेतावनी दिए ।

‘हाम्रो भद्रतालाई कमजोर ठान्ने प्रयास नगर्नू । राप्रपा नेपालका अध्यक्षलाई तुरुन्त रिहा नगरे एकैपटक ५० स्थानबाट प्रदर्शन निस्कने छ,’ उनले भने ।

लिङ्देनले जनताले बिकल्प खोजेकै कारण देश आन्दोलनमय भएको जिकिर गरे ।

राजसंस्था र हिन्दुराष्ट्र पुनस्र्थापनाको माग गर्दै राजावादीले आइतबार नारायणचौरमा गरेको प्रदर्शनमा प्रहरी हस्तक्षेप भएको छ ।

नारायणचौर क्षेत्रबाट प्रदर्शन गर्दै बालुवाटारतर्फ अघि बढ्न खोजेपनि प्रहरीले हस्तक्षेप गरेको हो ।

सो क्रममा प्रहरीले लाठिचार्ज गरेको थियो भने राप्रपा नेपालका अध्यक्ष थापा लगाएत केहीलाई नियन्त्रणमा लिएको छ ।

प्रहरीले रोकेपछि प्रदर्शनकारीहरू नारायणचौर क्षेत्रमा नै धर्नामा बसेका थिए ।

राजसंस्था र हिन्दुराष्ट्र पुनस्र्थापनाको माग गर्दै संयुक्त जनआन्दोलन परिचालन समितिले जेठ १५ गतेदेखि निरन्तर आन्दोलन गर्दै आएको छ ।

आफूहरुको मुद्दा स्थापित नभएसम्म आन्दोलन नरोकिने उनीहरूले बताउँदै आएका छन् ।

राजसंस्था पक्षधर आन्दोलनकारीमाथि प्रहरीको लाठीचार्ज, कमल थापालाई घिसार्दै भ्यानमा राखियो (तस्वीरहरू)