मन्त्रिपरिषद्को निर्णय : सशस्त्रका चार डीआईजीको पदावधि एक वर्ष थप

काठमाडौं । मन्त्रिपरिषद् बैठकले सशस्त्र प्रहरी बल नेपालका चार प्रहरी नायब महानिरीक्षक (डीआईजी)को पदावधि एक वर्ष थप गर्ने निर्णय गरेको छ । यो निर्णय मंगलबार राति १२ बजेदेखि लागू भएको हो ।

नम्बर एक बराह बाहिनी मुख्यालय पकली सुनसरीका प्रमुख शम्भु सुवेदी, नं तीन गढीमाइ बाहिनी मुख्यालय मकवानपुरका प्रमुख गणेश ठाडामगर, नं चार मुक्तिनाथ बाहिनी मुख्यालय कास्कीका प्रमुख कुलबहादुर नेम्वाङ र राष्ट्रिय सुरक्षा परिषद्को सचिवालय सिंहदरबारमा कार्यरत प्रहरी नायब महानिरीक्षक कमल गिरीको एक वर्ष पदावधि थप भएको सरकारका प्रवक्ता एवं सञ्चार तथा सूचना प्रविधिमन्त्री पृथ्वी सुब्बा गुरुङले जानकारी दिए ।

गृह मन्त्रालयको प्रस्तावमा चारैजना प्रहरी नायब महानिरीक्षकको पदावधि एक वर्ष थप गर्न मन्त्रिपरिषद्ले निर्णय गरेको हो ।

सशस्त्र प्रहरी नियमावली २०७२ को दफा ६५ को (ग)मा सशस्त्रका प्रहरी महानिरीक्षकको पदावधि चार वर्षको हुने व्यवस्था छ । चारैजना प्रहरी नायब महानिरीक्षक भएको मंगलबार चार वर्ष पूरा भएको छ ।

नियमावलीको दफा ६५ कै (ग)को (२) उपनियममा सशस्त्र प्रहरी महानिरीक्षक (एआईजी)को सिफारिसमा नेपाल सरकारले प्रहरी अतिरिक्त महानिरीक्षक (एआईजी)ं र प्रहरी नायब महानिरीक्षक (डीआईजी)को पदावधि चार वर्षपछि एक वर्ष थप गर्न सक्ने उल्लेख छ । यसै व्यवस्था अनुसार मंगलबारको मन्त्रिपरिषद् बैठकले चारैजना प्रहरी नायब महानिरीक्षकको पदावधि एक वर्ष थप गरेको हो ।