शाहीको आक्रोश : प्रमुख प्रशासकीय अधिकृत पठाउनु, हैन भने स्थानीय तहको चुनाव नगर्नु

काठमाडौं । देशभरका स्थानीय तहहरूमा समयमै प्रमुख प्रशासकीय अधिकृत पठाउन संसद्‌मा माग भएको छ ।

प्रतिनिधि सभाको मङ्गलबारको बैठकमा बोल्दै राप्रपा सांसद ज्ञानबहादुर शाहीले प्रमुख प्रशासकीय अधिकृत पठाउन माग गरेका हुन् ।

काठमाडौं महानगरपालिकामा विगत साढे २ महिनादेखि प्रमुख प्रशासकीय अधिकृत नहुँदा आर्थिक क्रियाकलाप ठप्प भएको शाहीले बताए । पालिकाहरूमा प्रमुख प्रशासकीय अधिकृत नहुँदा सरसफाइ गर्ने कर्मचारीले तलब नपाएको भन्दै शाहीले सरकारको आलोचनासमेत गरे ।

पैसा नपाएर कर्मचारीहरू काम गर्न नसक्ने स्थितिमा पुगेका छन् । “फोहोर उठाउने मान्छेको पाप लाग्ला सरकारलाई, त्यसो भएकाले  प्रमुख प्रशासकीय अधिकृत तत्काल पठाइयोस्, सभामुख महोदय,” शाहीले भने ।

प्रमुख प्रशासकीय अधिकृत रोकेर स्थानीय तहहरूलाई ठप्प पारेको विषयमा आक्रोश पोखेका शाहीले स्थानीय तहको चुनावमाथि समेत प्रश्न उठाएका थिए । “सरकारको यस्तो गतिविधि गर्ने हो भने स्थानीय तहको निर्वाचन नगर्दा हुन्छ,” शाहीले भने, “स्थानीय तहको चुनाव किन गराएको आफ्ना आसेपासे कार्यकर्तालाई अबिर लगाएर घोषणा गर्दिनुहोस् ।”