बच्चालाई परीक्षामा राम्रो अङ्क ल्याउन यसरी गर्नुहोस् सहयोग !

काठमाडौं । विद्यायलयमा वार्षिक परीक्षाहरू अब केही दिनमा शुभारम्भ हुँदैछन् । यस समयमा अभिभावकले कसरी आफ्नो बच्चालाई सिकाउने भन्ने कुरामा अन्योल हुन्छ ।

यदि तपाईं पनि बच्चाहरूलाई राम्रो अङ्क ल्याउन मद्दत गर्न चाहनुहुन्छ भने यस्ता कुरामा ध्यान दिन जरुरी छ ।

सकारात्मक संवाद स्थापित 

पढाइको बीचमा केही समय आराम वा आफ्नो मनपर्ने काममा बिताउनुपर्छ भनेर सल्लाह दिइन्छ, तर जब बच्चाहरू खेलेको वा मोबाइल चलाएको देख्छन् आमाबुवाको मन आत्तिन्छ । यस्तो अवस्थामा प्रायः आमा–बुबाले बच्चालाई किन नपढेको भनेर गाली गर्छन् । तिमी छिमेकीको बच्चाभन्दा कम अङ्क ल्याउनेछौ, तिमी फेल हुनेछौ वा तिमीले मेरो नाक काट्नेछौ जस्ता शब्दहरू प्रयोग गर्छन्, जबकि यो समय बच्चाहरूसँग सकारात्मक संवाद स्थापित गर्ने र सहयोग गर्ने हो ।

यदि तपाईं पनि आफ्ना बच्चाहरूको उन्नति र राम्रो अङ्कको अपेक्षा राख्नुहुन्छ भने बच्चाहरूलाई उनीहरूको समयतालिका बनाउनमा मद्दत गर्नुपर्छ । जसबाट बच्चाहरू पढाइको साथै मनोरञ्जन र आराम गर्ने समय पनि निकाल्न सकुन् ।

सुरक्षाको भाव महसुस 

अभिभावकहरूले शैक्षिक सत्रको सुरुमै बच्चाहरूलाई ट्युसन वा अनलाइन क्लास सुरु गराएर आफ्नो कर्तव्यबाट मुक्त भएको ठान्छन्, तर आमाबुवाको जिम्मेवारी कहिल्यै समाप्त हुँदैन ।

उनीहरूको परीक्षाको तयारीमा तपाईं निरन्तर सहयोग गर्नुपर्छ, जसबाट बच्चाहरूमा एक सुरक्षात्मक भाव उत्पन्न होस् । हरेक अभिभावक सधैँ शिक्षकहरूको सम्पर्कमा रहनुपर्छ र उनीहरूको समस्याबारे पनि शिक्षकसँग कुरा गर्नुपर्छ । परीक्षाहरूको अवधिमा आफन्तहरू र साथीहरूलाई सकेसम्म घरमा नबोलाउनुहोस् । त्यसैगरी तपाईं पनि कुनै विवाह आदि समारोहमा नजानुहोस् र यदि जानुभयो भने पनि चाँडै फर्कनुहोस् ।

लक्ष्यतर्फ अग्रसर गराउने

बच्चाहरूले जति पढे पनि उनीहरूलाई सधैँ केही छुटेको जस्तो अनुभव हुनसक्छ । यस्तो समयमा अभिभावकहरूले बच्चाहरूलाई प्रोत्साहित गर्नुपर्छ, जसबाट उनीहरूको आत्मविश्वास कायम रहोस् र उनीहरू निरन्तर आफ्नो लक्ष्यतर्फ अग्रसर रहुन् ।

आमाबुवाले धैर्य राख्नुपर्छ र बच्चाहरूलाई परीक्षा केवल ज्ञान जाँच्ने माध्यम हो भनेर विश्वास दिलाउनुपर्छ । यसले जीवनको सफलता र असफलताको निर्धारण गर्न सक्दैन ।