जल, सरसफाइ र फोहोर व्यवस्थापनमा नेपाल-भारतबीच समझदारी पत्रमा हस्ताक्षर

काठमाडौं । भारत र नेपालबीच जल, सरसफाइ र स्वच्छता  क्षेत्रमा सहयोग सुदृढ पार्ने उद्देश्यले  एक महत्त्वपूर्ण समझदारी पत्रमा हस्ताक्षर भएको छ ।

सोमबार भारतका  जल शक्ति मन्त्री  सी आर पाटिल र नेपालका  खानेपानी मन्त्री प्रदिप यादवले समझदारी पत्रमा हस्ताक्षर गरेका हुन् ।  समझदारी पत्रले दुई देशबीचको सहकार्यलाई नयाँ उचाइमा पुर्‍याउने अपेक्षा गरिएको छ।

समझदारी पत्र अनुसार  दुई देशले फोहोरमैला व्यवस्थापन, पानी संरक्षण, सरसफाइ र स्वच्छता सम्बन्धी संयुक्त प्रयासहरूलाई बढावा दिनेछन्। यसले दुवै देशका नागरिकहरूको जीवनस्तर सुधार गर्न र दिगो विकास लक्ष्यहरू प्राप्त गर्न मद्दत पुग्ने विस्वास गरिएको छ ।

हस्ताक्षर समारोहमा बोल्दै भारतीय  मन्त्री  पाटिलले समझदारी पत्र दुई देशबीचको मित्रता र सहकार्यको प्रतीक भएको बताए । उनले भारत नेपालसँग जल, सरसफाइ र स्वच्छता क्षेत्रमा सहकार्य गर्न प्रतिबद्ध रहेको पनि बताए।

मन्त्री यादवले  समझदारी पत्र नेपालको लागि महत्त्वपूर्ण उपलब्धि भएको बताउँदै यसले नेपालको जल, सरसफाइ र स्वच्छता क्षेत्रको विकासमा  योगदान पुर्‍याउने विश्वास व्यक्त गरे।

यी पहलले पानी संरक्षण, सरसफाइ र फोहोर व्यवस्थापन तर्फका संयुक्त प्रयासहरूलाई बढावा दिन मद्दत गर्ने बताइएको छ। समझदारी पत्रले दुई देशबीचको सम्बन्धलाई थप प्रगाढ बनाउने र दुवै देशका नागरिकको हितमा काम गर्ने अपेक्षा गरिएको छ।