चिटिक्क बन्यो भद्रपुर भन्सार

भद्रपुर, ८ चैत । झापाको भद्रपुर नगरपालिका–५ स्थित भद्रपुर भन्सार यतिबेला चिटिक्क बनेको छ ।

यसअघि फोहोरसँगै झाडी बनेको भद्रपुर भन्सार परिसर अहिले सौन्दर्यकरण गरिएसँगै चिटिक्क बनेको हो । भन्सार परिसरमा भद्रपुर वडा नं. ५ ले आकर्षक सात वटा फलैंचा निर्माण गरिदिएको छ भने भन्सारको आन्तरिक स्रोतबाट आकर्षक ‘मिनी गार्डेन’ बनाइएको कार्यालयका प्रमुख भन्सार अधिकृत अर्जुन सिटौलाले जानकारी दिनुभयो ।

“भुइँमा पेवर्स लगाएर रंगरोगनका साथै विभिन्न प्रजातिका फूलहरु लगाएका छौं”, उहाँले भन्नुभयो, “यसअघि पार्क भएको स्थानमा चोरी पैठारीमा प्रयोग भएका सवारी साधान र सामान राख्ने गरिएको थियो ।” वडासँग समन्वय गरेर भन्सारको आन्तरिक बजेटबाट करिब रू छ लाखको बजेटमा भन्सार परिसरलाई सौन्दर्यकरण गरिएको उहाँले बताउनुभयो ।

“मेची पुल सञ्चालनमा आएपछि यो नाकाबाट चहलपहल बढेको छ”, उहाँले भन्नुभयो, “भारतीय र आन्तरिक पर्यटकका लागि केही समय भए पनि अल्मलिने र फोटो खिच्ने ठाउँ भएको छ ।” भन्सार परिसरमा रहेको सबैभन्दा पूरानो मौलो मन्दिरको पनि जोर्णेद्वार गरिएको उहाँले बताउनुभयो ।

त्यसैगरी, गाडी इन्ट्री र एक्जिटका लागि व्यवस्थित कोठा निर्माण गरिएको छ । चोरी पैठारीमा संलग्न भएका चार पाङ्ग्रे, तीन पाङ्ग्रे र दुई पाङ्ग्रे गरी एक सय ५३ वटा सवारी सात वर्षपछि लिलाम गरिएको भन्सार प्रमुख सिटौलाले बताउनुभयो । जसबाट रू ५७ लाख राजवश्व समेत असुलउपर भएको छ ।

भद्रपुर–गलगलिया सीमा नाका जोड्ने मेची नदीमा पक्की पुल सञ्चालनमा आए लगत्तै सरकारले २०७५ भदौ १ गते छोटीबाट स्तरोन्नति गर्दै भद्रपुर भन्सार कार्यालयलाई मूल भन्सार बनाएको थियो ।

भन्सार विभागले भद्रपुर भन्सारको स्तरोन्नति गरेसँगै नयाँ भौतिक संरचना निर्माणका लागि बाटोको उत्तरपट्टि एक सय चार वटा कित्ताको नौ बिघा जग्गा अधिग्रहण गरिएको छ । जमिन र घर–टहराको छुट्टाछुट्टै मूल्याङ्कन रू ६० करोड १३ लाख ८२ हजार चार सय तीन गरिएकोमा हाल रू तीन करोड रुपैयाँ मात्र वितरण गर्न बाँकी रहेको कार्यालयले जनाएको छ । ऐलानी सहित करिब १० बिघा जग्गा भन्सारले अधिग्रहण गरेको छ ।

The post चिटिक्क बन्यो भद्रपुर भन्सार appeared first on Jhapa Online.