विशेषको फैसलाविरुद्ध अख्तियार सर्वोच्चमा

काठमाडौं । अख्तियार दुरुपयोग अनुसन्धान आयोगले विशेष अदालतले गरेको दुईवटा फैसलाउपर चित्त नबुझेको भन्दै बिहीबार सर्वोच्च अदालतमा पुनरावेदन गरेको छ ।

आयोगले पोखरा विश्वविद्यालयका उपप्राध्यापक रवीन्द्रप्रसाद बरालविरुद्ध दायर गरेको मुद्दामा विशेषले २०८० फागुन १३ गते फैसला गरेको थियो । सो फैसलाउपर चित्त नबुझेको भन्दै आयोगले सर्वोच्चमा आज पुनरावेदन गरेको हो ।

यस्तै, मकवानपुर मनहरी गाउँपालिकाका तत्कालीन प्रमुख प्रशासकीय अधिकृत देवराज चौलागाईँ र इन्जिनियर अमितकुमार ठाकुरका हकमा विशेष अदालतले गरेको फैसला चित्त नबुझेको भन्दै फैसलाउपर बिहीबारै सर्वोच्चमा पुनरावेदन गरेको हो । मनहरी गाउँपालिका–६ स्थित लोथर हाङलाङ फरिवाङ सडक स्तरोन्नति गर्ने कार्यमा भ्रष्टाचार भएको ठहर गरेको थियो । आयोगले तीन लाख ९१ हजार ९२९ रुपैयाँ बराबरको बिगो माग दाबी गरेको थियो ।

विशेषले उक्त मुद्दामा गत भदौ ३० गते फैसला गरेको थियो । आयोगले गरेको मागदाबीअनुसारको फैसला नभएको पाइएपछि बिहीबार ती दुवै मुद्दामा पुनरावेदन गरिएको प्रवक्ता राजेन्द्रकुमार पौडेलले जानकारी दिए ।