आईपीएलमा म्याच फिक्सिङको आशङ्का, बीसीसीआईले दियो यस्तो चेतावनी

काठमाडौं । आईपीएल २०२५ जारी छ ।

विश्वको सबैभन्दा ठूलो क्रिकेट लिगको प्लेअफमा स्थान बनाउन रोमाञ्चक खेलहरु हुन भइरहेको बेलामा म्याच फिक्सिङको छायाँ मडारिएको छ ।

भारतीय क्रिकेट नियन्त्रण बोर्ड (बीसीसीआई)ले म्याच फिक्सिङको सम्भावनालाई ध्यानमा राख्दै सबै फ्रान्चाइजी मालिक, खेलाडी र सहयोगी कर्मचारीलाई मात्र नभई कमेन्टेटरलाई पनि चेतावनी दिएको छ ।

बीसीसीआईको भ्रष्टाचार विरोधी सुरक्षा इकाई (एसीएसयू) हैदराबादका एक तथाकथित व्यापारीको सट्टेबाजहरूसँग सम्बन्ध रहेको विश्वास गर्छ ।

क्रिकबजको रिपोर्टअनुसार बीसीसीआईले आईपीएल २०२५ का सबै सरोकारवालालाई चेतावनी जारी गरेको छ कि व्यक्तिहरूलाई भ्रष्ट गतिविधिहरूमा संलग्न हुन लोभ्याउने प्रयास भइरहेको छ । यसलाई ध्यानमा राख्दै बोर्डले पहिले नै फ्रान्चाइजी मालिकहरू, खेलाडीहरू, सहयोगी कर्मचारीहरू र टिप्पणीकारहरूलाई पनि चेतावनी दिइसकेको छ कि शङ्कास्पद रेकर्ड भएका व्यापारीले उनीहरूलाई सम्पर्क गर्ने प्रयास गर्न सक्छन् ।

बोर्डले भनेको छ, “यदि उक्त पक्षबाट कुनै सम्पर्क छ भने त्यसको बारेमा जानकारी दिन अनुरोध गरिएको छ । व्यक्तिहरूले महङ्गा गहना र उपहार दिएर खेलाडी वा प्रशिक्षकहरूलाई कसरी लोभ्याउन सक्छन् भन्ने बारेमा पनि स्पष्टता छ । उनी प्रशंसक बनेर टोली र सहभागीहरूसँग नजिक हुने प्रयास पनि गर्छन् ।”

यति मात्र होइन, ती व्यापारी टिम होटल र खेलमा समेत पुगेको बताइको छ, जहाँ उसले खेलाडी र कर्मचारीहरूसँग मित्रता गाँस्ने प्रयास गर्छन् र उनीहरूलाई निजी पार्टीहरूमा आमन्त्रित गर्छन् । उनले खेलाडीहरूलाई मात्र नभई उनीहरूका परिवारलाई पनि उपहार दिएका उदाहरणहरू छन् ।

प्रतिवेदनमा थप भनिएको छ, “यस व्यक्तिले सामाजिक सञ्जाल प्लेटफर्महरू मार्फत विदेशमा बस्ने खेलाडी वा प्रशिक्षकका आफन्तहरूलाई सम्पर्क गर्ने प्रयास गरेको छ ।”

आईपीएलमा म्याच फिक्सिङका घटना कहिले बाहिर आए ?

सन् २०१० मा आईपीएलमा म्याच फिक्सिङको घटना बाहिर आएको थियो । बेलायती पत्रिका द टेलिग्राफका अनुसार त्यतिबेला दक्षिण अफ्रिकामा आयोजित आइपीएलमा स्पट फिक्सिङ भएको थियो । यद्यपि, कुनै ठोस प्रमाण फेला परेन ।

आईपीएलको छैटौं सिजनमा म्याच फिक्सिङको आरोप लागेपछि राजस्थान रोयल्सका तीन खेलाडी एस श्रीसन्त, अजित चण्डिला र अंकित चव्हाणलाई दिल्ली प्रहरीले पक्राउ गरेको थियो । लिग जारी रहे पनि, राजस्थान रोयल्सलाई २ वर्षको लागि प्रतिबन्ध लगाइएको थियो । कोर्टमा लामो लडाइँपछि खेलाडीहरूले क्लिन चिट पाए, तर त्यसपछि उनीहरूको करियर बर्बाद भयो ।

सीएसकेका मालिक एन श्रीनिवासनका ज्वाइँ गुरुनाथ मयप्पनमाथि पनि ठगीको आरोप लागेको थियो । जसका कारण CSK लाई २ वर्षको प्रतिबन्ध पनि लगाइएको थियो । तर, पछि अदालतले यो मुद्दामा पनि क्लिन चिट दियो ।