धरानको जंगलमा मृत भेटिएकी चुनुकुमारीको हत्या गर्न श्रीमानले नै भारु पाँच लाखको सुपारी दिएको खुलासा

झापा, ५ बैशाख । सुनसरीको धरानस्थित जंगलमा अर्धनग्न अवस्थामा मृत भेटिएकी ३४ वर्षीया चुनुकुमारी दाहाल बुढाथोकीको आफ्नै श्रीमानको योजनामा हत्या भएको खुलेको छ ।

श्रीमान् प्रेम दाहालले आफ्नी श्रीमतीको हत्याका लागि भारु पाँच लाखको सुपारी दिएको प्रहरीको अनुसन्धानबाट खुलेको छ । धरान उपमहानगरपालिका–६ स्थित पञ्चकन्या सामुदायिक वनमा गत सोमबार दिउँसो गोठालाहरूले लसुनेको रुखमुनि अर्धनग्न अवस्थामा महिलाको शव फेला पारेपछि प्रहरीलाई खबर गरेका थिए। त्यसपछि सुनसरी प्रहरी र प्रदेश प्रहरी कार्यालय विराटनगरले संयुक्त रूपमा अनुसन्धान थालेको थियो ।

वैदेशिक रोजगारीका लागि कोरियामा रहेका प्रेम दाहाल आफ्नी श्रीमतीको हत्याका लागि योजना बनाई कोरियाबाट नेपाल आएको खुलेको प्रहरी अनुसन्धानबाट पत्ता लागेको छ । ‘श्रीमानले भारु पाँच लाख रुपैयाँमा सुपारी दिएको र त्यसपछि हत्या गर्नका लागि एक भारतीय नागरिक आएका थिए । श्रीमानले श्रीमतीको हत्याका लागि पहिले नै ३० हजार रुपैयाँ एडभान्स दिएको र बाँकी रकम काम सम्पन्न भएपछि दिने सर्त रहेको थियो’, प्रहरी अनुसन्धानमा संलग्न एक अधिकृतले बताए । प्रहरीले घटनामा संलग्न चार जनालाई पक्राउ गरेको छ। अनुसन्धानले यस घटनामा कुल ६ जनाको संलग्नता रहेको देखाएको छ।

धनकुटाको महालक्ष्मी नगरपालिका २ की चुनुकुमारी दाहाल बुढाथोकी करिब २ वर्षअघिदेखि आफ्नो छोरालाई पढाउनका लागि सुनसरीको इटहरी उपमहानगरपालिका २, हलगडामा डेरा गरी बस्दै आएकी थिइन्। उनको माइती महालक्ष्मी नगरपालिका १ मा रहेको छ।

The post धरानको जंगलमा मृत भेटिएकी चुनुकुमारीको हत्या गर्न श्रीमानले नै भारु पाँच लाखको सुपारी दिएको खुलासा appeared first on Jhapa Online.