सरकारलाई प्रचण्डको प्रश्न : विपक्षीले जस पाउँछ भनेर काम नगरेको हो ?

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सरकारको नीति तथा कार्यक्रममा राष्ट्रिय गौरवका आयोजनाको नामसमेत उल्लेख नभएको बताएका छन् ।

प्रतिनिधि सभाको सोमबारको बैठकलाई सम्बोधन गर्दै उनले सट्टा विगतमा सुरु गरिएका राम्रा कार्यहरुलाई पनि खारेज गर्न खोजिनु आपत्तिजनक भएको बताए ।

उनले देश विकासको आधार तयार गर्ने आयोजनाहरुलाई पन्छ्याएर भ्यू टावर र पानी जहाजका आयोजनालाइ प्राथमिकता दिएर कस्तो समृद्धि हासिल गर्न खोजेको हो भन्दै प्रश्न गरे ।

प्रचण्डले भने, “राष्ट्रिय गौरवका आयोजनाहरुको कार्यान्वयनमा देखिएका समस्या पहिचान गरी नयाँ कार्ययोजना ल्याउन के ले रोकेको हो दुई तिहाइको सरकारलाई ? कतै यी आयोजनाहरु सम्पन्न भएमा माओवादीलगायत विपक्षी पार्टीहरुले जस पाउँछन् भन्ने सङ्कीर्णता र पूर्वाग्रहले त काम गरेन ?”