ट्रम्पले अमेरिका आयात हुने स्टिल र आल्मुनियममा बढाए कर

काठमाडौं । अमेरिकी राष्ट्रपति डोनाल्ड ट्रम्पले स्टिल र आल्मुनियम आयातमा कर बढाएका छन् । अमेरिकाले हालको कर दर २५ प्रतिशतबाट बढाएर ५० प्रतिशत पुर्‍याउने घोषणा गरेको र यो आगामी बुधबारदेखि लागू हुने बीबीसीको समाचारमा उल्लेख छ ।

पेन्सिलभेनियाको पिट्सबर्गमा आयोजित एक र्‍यालीमा ट्रम्पले यो कदमले स्थानीय स्टिल उद्योग र राष्ट्रिय उत्पादनलाई बढावा दिने र चीनमाथिको निर्भरता कम गर्ने बताए ।

उनले अमेरिकी स्टिल र जापानको निप्पोन स्टिल बीचको साझेदारीले यस क्षेत्रको स्टिल उत्पादनमा १४ अर्ब डलर लगानी गर्ने पनि जानकारी दिए ।

‘यद्यपि यो साझेदारीको विवरण अझै स्पष्ट छैन र दुबै कम्पनीहरूले अहिलेसम्म कुनै सम्झौताको पुष्टि गरेका छैनन्,’ समाचारमा जनाइएको छ ।

र्‍यालीमा स्टील कामदारहरूको भीडलाई सम्बोधन गर्दै ट्रम्पले भने, ‘कुनै पनि कामबाट कटौती हुनेछैन् र आउटसोर्सिङ हुनेछैन । र, प्रत्येक अमेरिकी स्टिल कामदारले चाँडै नै ५ हजार बोनस पाउनेछन्, जुन उनीहरूले पाउनु पर्ने हो ।’