बालेनलक्षित प्रधानमन्त्रीको टिप्पणी- नीति छैन तर, अहङ्कार देखाउनुपरेको छ

काठमाडौं । प्रधानमन्त्री केपी शर्मा ओलीले नेपाली समाजलाई फोहोरी बनाउन नदिने बताएका छन् । सोमबार गैरन्यायिक सडक तथा खोला मापदण्ड पीडित सङ्घर्ष समितिका प्रतिनिधिहरूसँगको भेटमा उनले यस्तो बताएका हुन् ।

“हामी समाजलाई फोहोरी बनाउन चाहँदैनौँ । हाम्रो त उच्चस्तरीय संस्कृति हो । हाम्रो संस्कृति भनेको गाउने, नाच्ने, दुखीहरूलाई सहयोग गर्ने हो,” प्रधानमन्त्री ओलीले भने, “हामी समाजलाई फोहोरी बनाउन दिँदैनौँ । हामी आफू पनि गर्दैनौँ ।”

उनले समाजबारे कहिल्यै नसोचेकाहरूबाट देश कहिल्यै नबन्ने बताए । तर, उनीहरू नै बढी कराइरहेको उल्लेख गर्दै उनले भने, “आफ्नो अहङ्कार देखाउने, घमण्ड देखाउनेबाट देश बन्दैन । नीति छैन, कार्यक्रम छैन तर, उसैलाई अहङ्कार देखाउनुपरेको छ । यसरी पार लाग्दैन ।”

प्रधानमन्त्री ओलीले उपत्यकाभित्रका नदी किनार विवादमा समाधान निस्किनेमा विश्वस्त हुन आग्रह गरे । सर्वोच्च अदालतमा चाँडै भ्याकेट निवेदन पुग्ने उल्लेख गर्दै उनले भने, “सम्माननीय अदालतले त्यसमाथि पुनर्विचार गर्ला । म तपाईंहरूलाई ढुक्कसँग रहन आग्रह गर्छु ।”