घुससहित पक्राउ परेका ट्राफिक प्रमुखविरुद्ध भ्रष्टाचार मुद्दा

काठमाडौँ । रोल्पाका ट्राफिक प्रहरी प्रमुख तथा प्रहरी नायब निरीक्षक (सई) ललितकुमार बुढाथोकीविरुद्ध भ्रष्टाचार मुद्दा दायर भएको छ ।

सेवाग्राहीसँग घुस लिएको अवस्थामा पक्राउ परेका बुढाथोकीविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको हो ।

बुढाथोकीलाई सवारी साधन आवत÷जावत गर्न सहजीकरण गरिदिएबापत सेवाग्राहीसँग २५ हजार रुपैयाँ घुस लिएको अवस्थामा अख्तियारको टोलीले पक्राउ गरेको थियो ।

उनीविरुद्ध भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुरमा २५ हजार रुपैयाँ बिगो मागदाबी गर्दै मुद्दा दायर गरिएको छ ।