पहिलो इनिङ्समा मधेस १२९ रनमा अलआउट, गुल्शनको फाइफर

काठमाडौं । जय ट्रफी एलिट कपमा नेपाल पुलिस क्लबविरुद्ध मधेस प्रदेश १२९ रनमा अलआउट भएको छ ।

वीरगञ्जस्थित नारायणी क्रिकेट मैदानमा जारी खेलमा मधेसले आफ्नो पहिलो इनिङ्समा ४२.४ ओभरमा १२९ रन बनाएर अलआउट भएको हो ।

मधेसका लागि मयन यादवले अर्धशतकीय पारी खेले । उनले १०२ बलमा ५ चौका र २ छक्का प्रहार गर्दै ५९ रन जोडे ।

निरज यादवले २९ रन बनाए । अभिषेक तिवारी १७ रनमा अविजित रहे । अन्य खेलाडीले दोहोरो अङ्क छुन सकेनन् ।

पुलिसका लागि गुल्शन झाले ५ विकेट लिए । त्यस क्रममा १३ ओभरमा ४० रन खर्चे । साथै, ४ मेडन ओभर पनि फाले ।

गुल्शनले २७.३ ओभरमा विशाल पटेल, २९.१ मा साहिल पटेल, ३१.१ मा राहुल मन्डल, ३५.४ मा मयन यादव र ३७.१ मा रुपेश सिंहलाई आउट गरे ।

यस्तै, कुशल भुर्तेलले २ तथा ललित राजवंशी र सर्वण यादवले १–१ विकेट लिए ।

टस जितेर पुलिसले पहिले बलिङ गर्ने निर्णय लिएको हो ।