टाइगर कप भलिबल : आर्मी टाइगर ग्रुपसँग पराजित

काठमाडौं । पाँचौं टाइगर कप भलिबलमा महिलातर्फ त्रिभुवन आर्मी क्लब टाइगर ग्रुप पोखरासँग पराजित भएको छ ।

पोखरा रङ्गशालाको भलिबल कोर्टमा आइतबार भएको खेलमा टाइगर ग्रुपले आर्मीलाई ३–० को सोझो सेटमा पराजित गरेको हो ।

टाइगरले आर्मीलाई पहिलो सेटमा २५–१४, दोस्रोमा २५–११ र तेस्रोमा २५–२१ ले हराएको हो ।

शनिबार बेलुकी खराब प्रकाशका कारण आर्मी र टाइगर बीचको खेल रोकिएको थियो । खेल रोकिँदा आर्मी २–१ को सेटले अगाडि थियो ।

अर्को खेलमा पुरुषतर्फ साविक विजेता टिप टप हेल्प नेपाल र भारतको सुनिल भलिबल क्लब, कुरुक्षेत्रबीच प्रतिस्पर्धा हुँदैछ ।

अर्को खेलमा गण्डकी प्रदेश र नेपाल पुलिस क्लब तथा एपीएफ र त्रिभुवन आर्मी क्लबबीच प्रतिस्पर्धा हुनेछ ।

यसपश्चात प्रतियोगितमा हार व्यहोरेको र जित हासिल गरेको टोलीको फरक फरक लिग खेल सुरु हुनेछ । जित हासिल गरेको समूहबाट शीर्ष २ टोलीले पहिलो क्वालिफायर खेल्ने छ । तेस्रो स्थानमा रहेको टोलीले भने एलिमिनेटर खेल्ने छ ।

हार्ने टोलीको समूहबाट शीर्ष स्थानमा रहने टोलीले एलिमिनेटरमा स्थान पक्का गर्नेछ । दोस्रो र तेस्रो स्थानमा रहने टोलीको यात्रा भने समाप्त हुनेछ ।

एलिमिनेटरको विजेताले फाइनल प्रवेशका लागि पहिलो क्वालिफायरमा पराजित हुने टोलीसँग भिड्ने छ ।