वेस्ट बैङ्कमा इजरायली आक्रमण : १५ दिनयता ५० प्यालेस्टिनी लडाकुको मृत्यु

जेरुसेलम । इजरायल डिफेन्स फोर्स (आईडीएफ)ले १५ दिनअघि उत्तरी वेस्ट बैङ्कमा सुरू गरेको आक्रमणमा हालसम्म ५० प्यालेस्टिनी लडाकु मारिएको दाबी गरेको छ ।

जेनिन, तुल्करेम र तामुन क्षेत्रमा कारबाहीका क्रममा ३५ लडाकु मारिएको आईडीएफले जनाएको छ भने अन्य १५ जना ड्रोन आक्रमणमा मारिएका छन् । आईडीएफले यी कारबाहीका क्रममा सर्वसाधारणलाई निशाना बनाएको पनि स्वीकार गरेको छ ।

आईडीएफले हाल १०० प्यालेस्टिनी लडाकुलाई नियन्त्रणमा लिएको र ४० भन्दा बढी हतियार बरामद गरेको छ । ‘अपरेसन आइरन वाल’का क्रममा ८० भन्दा बढी विस्फोटक पदार्थलाई पनि निष्क्रिय पारिएको आईडीएफले जनाएको छ ।

अपरेसन २१ जनवरीमा सुरु गरिएको थियो । सेनाले उक्त अपरेसन आगामी केही हप्तासम्म जारी रहने जनाएको छ । आईडीएफले जेनिन शरणार्थी शिविरका २३ वटा भवन ध्वस्त पारेको छ, जसलाई लडाकुहरूले आफ्नो कार्यका लागि प्रयोग गरेका थिए ।

यसैबीच इजरायलका प्रधानमन्त्री बेन्जामिन नेतान्याहु आइतबार अमेरिका गएका छन् ।

‘युद्धमा हामीले गरेका निर्णयहरूले मध्यपूर्वको अनुहार बदलिसकेको छ । म डोनाल्ड ट्रम्पसँग एक धेरै महत्त्वपूर्ण बैठकको लागि वाशिङ्गटन जाँदैछु । राष्ट्रपति ट्रम्पले आफ्नो पदभार ग्रहण गरेपछि कुनै विदेशी नेतासँग यो पहिलो भेट हुनेछ । मलाई लाग्छ कि यो इजरायल–अमेरिकी गठबन्धनको लागि ठूलो क्षण हुनेछ,’ अमेरिका प्रस्थान गर्नुअघि उनले भनेका थिए ।