एमआरसीपी यूके पेसेस परीक्षा सम्पन्न

काठमाडौं ।
तेस्रो एमआरसीपी यूके पेसेस परीक्षा चैत्र ८ गते सम्पन्न भएको छ । नेपाल मेडिसिटी अस्पताललाई परीक्षा केन्द्र बनाइएको पेसेस परीक्षा चैत्र ६ गतेबाट शुरू भएको थियो । यो परीक्षा तीन दिनसम्म चलेको थियो ।

नेपाल मेडिसिटीले दुई वर्षदेखि पेसेस परीक्षा सञ्चालन गर्दै आएको छ । बेलायतबाट आयोजना गरिने परीक्षामा यस वर्ष ४३ जना परीक्षार्थीहरू सहभागी भएका थिए । यसपटक परीक्षाका लागि नेपाल, बंगलादेश, भारत र अस्ट्रेलियाबाट परीक्षार्थीहरू आएका थिए । त्यस्तै, परीक्षा सञ्चालन गर्न बेलायतबाट पाँच जना र नेपालबाटै ११ जना परीक्षक र २ जना प्रशिक्षार्थी परीक्षकको उपस्थिति रहेको थियो ।

एमआरसीपी यूके चिकित्सकहरूको लागि विश्वव्यापी रूपमा मान्यता प्राप्त योग्यता हो । यो योग्यता प्राप्त गर्नाले प्रशिक्षार्थी चिकित्सकले आफ्ना बिरामीहरूलाई उत्कृष्ट योग्य चिकित्सकको रूपमा सेवा गर्न उपयुक्त ज्ञान, सिप र मनोवृत्ति हासिल गरेको प्रमाणित गर्छ । यो परीक्षामा उत्तीर्ण भएका चिकित्सकहरूले एमआरसीपी यूकेबाट अनुमति पाएका जुनैसुकै अस्पतालमा काम गर्न सक्दछन् ।

धेरै चिकित्सकहरूले यो परीक्षा लिन र एमआरसीपी युके योग्यता पूरा गर्नको लागि बेलायतको यात्रा गर्नुपर्ने अवस्था थियो । नेपालमा यस परीक्षाको लागि केन्द्र खोलिँदा नेपालका सबै चिकित्सकहरूलाई आफ्नै देशमा परीक्षा दिने वातावरण बनेको छ । दक्षिण एसियाको परीक्षा केन्द्रमध्ये नेपाल पनि पर्दछ तर नेपालका लागि भने नेपाल मेडिसिटी अस्पताल पहिलो र एकमात्र केन्द्र हो ।

परीक्षाका लागि डा. रोड्रिक हार्वे– एक्युट मेडिसिन, डा. ब्यान अल सफर र डा. अदम स्टोन– ग्यास्ट्रोइन्टेरोलोजी, डा. भेदामुर्थी आधियामन र डा. लतना मुनाङ– जेरियाट्रिक मेडिसिन बेलायतबाट परीक्षा निरीक्षणका लागि आएका हुन् । उनीहरू रोयल कलेज अफ फिजिसियनस अफ एडिनबर्ग र रोयल कलेज अफ फिजिसियन लन्डनबाट आएका हुन् ।

त्यस्तै, नेपालबाट डा. निरज जोशी, डा. धिरज मानन्धर, डा. अर्पना न्यौपाने, डा. सञ्जितकृष्ण श्रेष्ठ, डा. सुदिप श्रेष्ठ, डा. रक्षा पाण्डे, डा. यादव के.डी भट्ट, डा. बुद्धि पौडेल, डा. सितल अधिकारी, डा. महेशराज सिग्देल, डा. रविन्द्र श्रेष्ठ परीक्षकका रूपमा सहभागी भएका थिए ।

नेपालका लागि प्रमुख परीक्षाका निरीक्षक हुन् डा. निरज जोशी । नेपाल मेडिसिटीमा ग्यास्ट्रोइन्टेरोलोजिस्ट कन्सल्टेन्ट रहेका डा. जोशीले डाक्टरको क्लिनिकल विशेषज्ञताको मूल्यांकन गर्न तथा बिरामीलाई चिकित्सकले कसरी उपचार गर्ने र कस्तो व्यवहार गर्छन् भन्ने विश्लेषण गर्न यो परीक्षा लिइने बताउनुभयो ।

‘यो फिजिसियन चिकित्सकहरूको प्रयोगात्मक परीक्षा हो । यसमा भाग लिन पहिले दुईवटा लिखित परीक्षामा उत्तीर्ण हुनुपर्छ’ –डा. जोसीले भन्नुभयो । परीक्षामा पाँचवटा स्टेसनहरू राखिएका थिए जसको माध्यमबाट परीक्षार्थीहरूलाई उनीहरूको ज्ञान, क्लिनिकल सीप, बिरामीको स्वायत्तता र सञ्चारको सम्मान गर्ने क्षमताको लागि मूल्यांकन गरिएको थियो मेडिसिटीले जारी गरेको विज्ञप्तिमा उल्लेख गरेको छ ।