रुस र युक्रेनबीच ‘ब्ल्याक सी’मा नौसैनिक युद्धविराम सहमति

एजेन्सी । साउदी अरबमा तीन दिनसम्म चलेको शान्ति वार्तापछि अमेरिकाले रुस र युक्रेन दुवै पक्षलाई ब्लाक सीमा नौसैनिक युद्धविराम गर्ने सहमति दिएको जनाएको छ। वासिङ्टनले एक विज्ञप्ति जारी गर्दै सबै पक्षले दीर्घकालीन र स्थायी शान्तिको लागि काम गर्ने प्रतिबद्धता व्यक्त गरेको जनाएको छ।

अमेरिकी अधिकारीहरूका अनुसार, रुस र युक्रेनले आफ्नो ऊर्जा पूर्वाधारमा आक्रमण नगर्ने प्रतिबद्धता गरेका छन् । तथापि, रुसले आफ्नो खाद्य र मल व्यापारमा लगाइएका धेरै प्रतिबन्धहरू हटाइए पछि मात्रै युद्धविराम लागू हुने जनाएको छ।

वार्ता प्रक्रियामा अमेरिकी अधिकारीहरूले मस्को र कीभका प्रतिनिधिहरूसँग रियादमा गरेको छुट्टाछुट्टै वार्ताका क्रममा  युद्धविरामको सम्झौता भएको थियो ।

तर, वासिङ्टनको घोषणापछि क्रेमलिनले रुसको खाद्य र मल व्यापारसँग सम्बन्धित प्रतिबन्धहरू हटाइने बेलामा मात्रै युद्धविराम लागू हुने जनाएको छ ।

मस्को आफ्ना प्रतिबद्धताबाट पछि हटेमा युक्रेनले थप प्रतिबन्ध र अमेरिकाबाट थप सैन्य सहयोगको माग गर्ने जेलेन्स्कीले जनाएको बीबीसीले जनाएको छ ।

यस सम्झौताबाट यदि कुनै पनि पक्षले आफ्नो प्रतिबद्धता पूरा नगरेको खण्डमा युक्रेनले आत्मरक्षाको अधिकार प्रयोग गर्ने चेतावनी दिएको छ।