रक्षामन्त्रीले महाकुलुङ क्षेत्रलाई निकुञ्जको रूपमा घोषणा गर्न समन्वय गर्ने

काठमाडौं । रक्षामन्त्री मानवीर राईले सोलुखुम्बु जिल्लाको महाकुलुङ क्षेत्रलाई राष्ट्रिय निकुञ्जको रूपमा घोषणा गर्नका लागि समन्वय गर्ने बताएका छन् ।

जिल्लाको महाकुलुङ गाउँपालिकाले सोमबार काठमाडौंमा आयोजना गरेको ‘२ दिने प्रशासनिक घुम्ती शिविर’को उद्घाटन समारोहलाई सम्बोधन गर्दै रक्षामन्त्री राईले यस्तो बताएका हुन् ।

“खासगरी यो माग त्यहाँकै स्थानीयबाट पनि भइरहेको हो । त्यसैले यसमा मैले पनि सम्बन्धित मन्त्रालय र मन्त्रीसँग समन्वय गर्छु,” रक्षामन्त्री राईले भने ।

केही वर्षयता सगरमाथा र मकालु वरुण राष्ट्रिय निकुञ्जबीच भागलाई समेटेर ‘मेरापीक राष्ट्रिय निकुञ्ज’ घोषणा गर्ने तयारी भइरहेको हो । मेरापीक राष्ट्रिय निकुञ्ज स्थापनाका लागि बनेको अध्ययन कार्यदलले प्रतिवेदन तयार पारिसकेको छ ।

जिल्लाको महाकुलुङ, सोताङ, माप्य दुधकोशी गाउँपालिकाका क्षेत्र ओगट्ने भएकाले ती स्थानीय सरकारका प्रमुखहरूले स्थानीय बासिन्दाको मागलाई सरकारले छिटो सम्बोधन गर्नुपर्ने बताएउँदै आएका छन् ।

तर, निकुञ्ज घोषणा हुन भने सकेको छैन । यसमा रक्षामन्त्री राईले थप समन्वय गर्ने वचनबद्धता गरेका हुन् ।

यसैबीच ‘२ दिने प्रशासनिक घुम्ती शिविर’को उद्घाटन समारोहमै पुगेका कोशी प्रदेशसभा सदस्य गोम्बु शेर्पाले ‘कर्ज्याङ’ले भने निकुञ्ज घोषणाको मागलाई स्थगन गरेर गाउँपालिकाअन्तर्गत नै विकासको योजना बनाउनुपर्ने आवश्यकता औँल्याए ।

महाकुलुङलगायत आसपासका क्षेत्रलाई समेटेर निकुञ्जको रूपमा विकास गर्ने माग उठिरहँदा यसले भविष्यमा समस्या ल्याउनसक्ने प्रक्षेपण गर्दै उनले भने, “जनताको चाहना नै सर्वोपरी भए पनि जैविक विविधता र प्राकृतिक श्रोत-साधनको संरक्षण पनि मुख्य हो । यसले भविष्यमा सहजता दिन्छ ।”