नाडा अटो शोको उद्‌घाटन गर्न पुगेका अर्थमन्त्री पौडेलले भने- ‘मन्त्रीलाई भाषण गर्न नबोलाइदिनुस्, काम गर्न दबाब दिनुस्’ 

काठमाडौँ । अर्थमन्त्री विष्णुप्रसाद पौडेलले मन्त्रीहरूलाई भाषणमा समय व्यतीत गर्नुभन्दा काम गर्न दबाब दिन निजी क्षेत्रसँग आग्रह गरेका छन् । मंगलबार काठमाडौंको भृकुटिमण्डपमा ‘नाडा अटो शो २०२४’ को उद्‌घाटन गर्दै अर्थमन्त्री पौडेलले यस्तो आग्रह गरेका हुन् । 

उनले काम गर्ने की भाषण गर्ने भन्ने असहजता मन्त्रीहरूलाई हुने गरेको भन्दै मन्त्रीले सुन्नैपर्ने र आउनैपर्ने बाहेकका कार्यक्रममा बोलाउनु भन्दा काम गर्ने वातावरण बनाइदिन आग्रह गरेका छन् ।

‘मन्त्रीलाई एउटा अप्ठ्यारो हुँदोरहेछ, काम गर्ने कि भाषण गर्ने ? अहिले मन्त्रीहरुलाई भाषण नभई काम गरेर समयको उपयोग गर्नुपर्छ भन्ने लाग्छ ।’, उनले भने, ‘तर निजी क्षेत्रका छाता संगठनहरुले महत्वका साथ बोलाउनुहुन्छ । न आउँ यथोचित आधार मर्यादा भएन भन्ने लाग्छ । आउँ समय भाषण गर्नमा व्यतीत हुन्छ । त्यसकारण अर्थमन्त्रीले सुन्नैपर्ने, गर्नैपर्ने र आउनैपर्ने बाहेक काम गर, भाषण कम गर भनी सहजिकरण गरिदिनुहुन सादर अनुरोध गर्दछु ।’

त्यस्तै, अर्थमन्त्री पौडेलले नीतिगत स्थिरता सुरक्षित गर्ने हिसाबले वर्तमान सरकार अघि बढेको पनि दाबी गरेका छन् । 

‘अहिले बनेको सरकार संसद्ले बनाउने सबैभन्दा स्थिर सरकार हो । यो सरकारको स्थिरताले नीतिगत स्थिरताको एउटा बलियो आधार दिएको छ । त्यसैले हामीले नीतिगत स्थिरताको जुन डिमान्ड छ, सरकारले जायज भन्छ ।’, उनले भने, ‘यो सरकार सबै नेपालीको हो ।’