झापामा जहिल्यै रगत अभाव

सन्तोष शर्मा

बनियानी, १४ भदौ । झापामा जहिल्यै रगतको अभाव हुने गरेको छ ।

जिल्लामा अहिल्यै रगतको अभाव हुने गरेको नेपाल रेडक्रस सोसाइटी झापाका सभापति लोकराज ढकालले बताउनुभयो । मिर्गौला रोगीको संख्या बढ्नुका साथै क्यान्सर अस्पताल सञ्चालन आएपछि जिल्लामा रगतमा थप बृद्धि भएको उहाँले बताउनुभयो ।

“मिर्गौला बिग्रएर डायलासिस गर्नुपर्ने बिरामी एक सयको हाराहारीमा छन्”, उहाँले भन्नुभयो, “बिर्तामोडमा क्यान्सर अस्पताल सञ्चालन आएपछि रगत माग थप बढेको छ ।” दैनिकजसो हुने सवारी दुर्घटनाका कारण पनि रगतको माग बढ्दै गएको छ ।

झापाको सीमावर्ती क्षेत्रबाट समेत भारतीय नागरिक रगत लिन यहाँ आउने गरेको उहाँ बताउनुहुन्छ । काठमाडौं, मोरङ, सुनसरी लगायत अन्य जिल्लाका मानिस समेत रगत लिन आउने गरेका छन् ।

जिल्लामा ‘फ्रेस ब्लड’ (ताजा रगत) को समेत माग बढेको छ । चिकित्सकले बिरामीलाई फ्रेस ब्लड दिनुपर्ने सिफारिस गर्न थालेपछि पछिल्ला समय ताजा रगत माग उच्च भएको हो । रक्तदाताले ‘अन कल’ (बोलाएको आधारमा) आएर रक्तदान गर्ने गरेका छन् ।

झापामा दैनिक ६० देखि एक सय १० पिन्ट रगत खपत हुने गरेको छ । औषतमा दैनिक ८५ पिन्ट रगत खपत हुने रेडक्रस झापाले जनाएको छ ।

रेडक्रस झापा अन्रतगत भद्रपुर एक वटा, बिर्तामोड दुई वटा र दमकमा तीन वटा गरी छ वटा रक्त सञ्चार सेवा केन्द्रले सेवा प्रदान गर्दै आएको छ ।

युवा विदेश पलायन हुनु, दीर्घ रोगीको संख्या बढ्दै जानु, रक्तदान गर्न हिच्किचाउनु लगायतका रगत अभाव हुनुको मुख्य कारण भएको सभापति ढकाल बताउनुहुन्छ ।

“१८ देखि ५० वर्षका मानिस रक्तदानका लागि योग्य हुन्छन्”, उहाँले भन्नुभयो, “एक जनाले तीन÷तीन महिनामा रक्तदान गर्नु पर्छ, तर त्यस्तो हुन सकेको छैन ।” रगत अभाव हुन नदिन युवा तथा सामाजिक संघसंस्थाले रक्तदान कार्यक्रम गर्नुपर्नेमा उहाँले जोड दिनुभयो । झापामा रगत अभाव भए पनि रगत अभावकै कारण मानिसको मृत्यु नभएको उहाँले बताउनुभयो ।

The post झापामा जहिल्यै रगत अभाव appeared first on Jhapa Online.