ओलीको ७७ हजार फलोअर्स गुम्यो, बालेनको एक लाख थपियो

झापा, २० भदौ । काठमाडौँ महानगर पालिकाका मेयर बालेन्द्र शाह (बालेन) का समर्थकले प्रधानमन्त्री केपी शर्मा ओलीलाई सामाजिक सञ्जाल फेसबुकमा ‘अनफलो’ गर्ने अभियान चलाएपछि ओलीले झण्डै ७७ हजार फलोअर्स गुमाएका छन् । ओलीका फलोअर्स घट्दा बालेनका भने करिब एक लाख फलोअर्स बढेका छन् ।

बालेन समर्थले मंगलबारदेखि सुरु गरेको यो अभियानको प्रभावस्वरुप दुईदिनमै एमाले अध्यक्षसमेत रहेका ओलीलाई ७७ हजारले अनफलो गरेका हुन्। मंगलबार र बुधबार धेरै फलोअर्स गुमाएका ओलीलाई आज भने अनफलो गर्ने क्रम घट्न थालेको छ ।

बालेनका समर्थकले ओलीविरुद्ध यो अभियान चलाउनुअघि सामाजिक सञ्जाल फेसबुकमा ओलीका फलोअर्स ६ लाख ६६ हजार थिए। बिहीबार बिहानसम्म उनका फलोअर्स ७७ हजार घटेर ५ लाख ८९ हजारमा झरेको छ । बालेनका समर्थको यो अभियानपछि धेरैले नेपालको राजनीतिमा सक्रिय कुन दलका नेताका फलोअर्स कति छन् भन्ने खोजी गर्न थालेका छन् ।

काठमाडौँका मेयर बालेनका फलोअर्स भने फेसबुकमा २१ लाख छन् । जनप्रतिनिधिमा सबैभन्दा धेरै फलोअर्स हुने नेतामा पर्छन् बालेन । उनको कुनै दल छैन । उनी स्वतन्त्र मेयर हुन् ।

राजनीतिमा रहेका शीर्ष नेतामध्ये सबैभन्दा धेरै फलोअर्स भएका नेता नेपाल समाजवादी पार्टी (नेसपा) का अध्यक्ष तथा पूर्वप्रधानमन्त्री डा. बाबुराम भट्टराई हुन् । फेसबुकमा उनका १४ लाख फलोअर्स छन् । राष्ट्रिय स्वतन्त्र पार्टी (रास्वपा) का सभापति रवि लामिछानेको १२ लाख ९०, जनमत पार्टीका अध्यक्ष सीके राउतको ६ लाख ६७ हजार, माओवादी केन्द्रका अध्यक्ष पुष्पकमल दाहाल प्रचण्डको फेसबुकमा ५ लाख ७६ हजार, कांग्रेस सभापति शेरबहादुर देउवाको २ लाख ६५ हजार, नेकपा एकीकृत समाजवादीका अध्यक्ष माधवकुमार नेपालको १ लाख ९२ हजार, राप्रपा अध्यक्ष राजेन्द्र लिङ्ग्देनको १ लाख ५० हजार, जसपा नेपालका अध्यक्ष उपेन्द्र यादवको २६ हजार, जसपा अध्यक्ष अशोक राईको फलोअर्स ७ हजार ३ सय फलोअर्स छन् ।

धेरै फलोअर्स हुने जनप्रतिनिधिमा सुनसरीको धरानका मेयर हर्क सम्पाङ पनि पर्छन् । फेसबुकमा उनका फलोअर्स ८ लाख ६८ हजार छ। त्यस्तै धनगढीका मेयर गोपी हमाललाई ३ लाख ६ हजारले फेसबुकमा फलो गरेका छन् । नेपाल खबरबाट

The post ओलीको ७७ हजार फलोअर्स गुम्यो, बालेनको एक लाख थपियो appeared first on Jhapa Online.