प्रधानमन्त्री भन्छन्- हाम्रा खेल र खेलाडी अन्तर्राष्ट्रिय स्तरकै छन्

काठमाडौं । प्रधानमन्त्री केपी शर्मा ओलीले खेल क्षेत्रमा नेपालले आफूलाई सुधार्दै लगेको बताएका छन् । शुक्रबार बिहान बालुवाटारमा आयोजित ‘सम्मान तथा पुरस्कार वितरण कार्यक्रम’लाई सम्बोधन गर्दै उनले यस्तो बताएका हुन् ।

“खेल क्षेत्रमा हामीले प्रगति गरेका छौँ । क्रिकेट, फूटबल, भलिबल, टेबल टेनिस, ब्याडमिन्टन हरेक खेलमा हामीले प्रगति गर्दै लगेका छौँ । मैले हाम्रा खेलाडीहरूको खेल पनि हेरेको छु,” उनले भने ।

उनले नेपालका खेल र खेलाडी अन्तर्राष्ट्रिय स्तरकै रहेको बताए । “हाम्रा खेलहरूसँग मेरो आलोचनात्मक टिप्पणी के रहन्थ्यो भने खेलाडीहरू ढिला भए तर, अहिले त्यस्तो छैन । हाम्रो टिम हेर्दा अन्तर्राष्ट्रिय स्तरकै लाग्छ । हाम्रो खेल अन्तर्राष्ट्रिय स्तरकै छ,” उनले भने ।

प्रधानमन्त्री ओलीले अझ विभिन्न खेलहरूमा आफ्नो खेलविज्ञता विकास गर्नुपर्ने छ र सफलता हासिल गर्दै जानुपर्ने बताए ।

कार्यक्रममा पारालिम्पिकमा कास्यपदक विजेता पलेशा गोवर्धन सम्मानित भएकी थिइन् । प्रधानमन्त्री ओलीले पलेशाको प्रशंसा गर्दै सरकारले सम्मान गरेको बताए ।

“यस सम्मानबाट अरु पनि खेलाडीहरू उत्साहित हुनेछन् भन्ने विश्वास छ । यो एउटा सम्मान हो, शान हो । यो सम्मानको स्थानसम्म पुग्नका लागि आफ्नो मार्गदर्शन र सीपहरूबाट प्रशिक्षित गराउने कोच पनि धन्यवादका पात्र हुनुहुन्छ,” उनले भने ।

अगाडि उनले भने, “खेल क्षेत्र एउटा देश विशेषको कुरा हो, खेलले कुन देशले जित्यो भन्ने कुरा विश्वव्यापी रूपमा प्रचारित हुन्छ, कसले राम्रो खेल्यो भन्ने कुरा विश्वव्यापी रूपमा प्रचारित हुन्छ । पहिलो कुरा त सहभागिता नै सजिलो कुरा हुँदैन । तर, हाम्रो सहभागिता पहिलेदेखि नै छ ओलम्पिकमा । तर, यसपटक नयाँ खुड्किलो उक्लियौँ ।”