‘नियममा चल्ने सहकारी डुब्दैनन्, कसैलाई डुबाउँदैनन्’- ओली 

काठमाडौँ । प्रधानमन्त्री केपी शर्मा ओलीले गैरसहकारी र अनुचित लाभ लिन खोज्नेहरुका कारण सहकारी क्षेत्र बिग्रिएको बताएका छन् । आइतबार सहकारी संस्था बचत रकम दुरुपयोग सम्बन्धमा संसदीय छानविन विशेष समितिको बैठकमा बोल्दै प्रम ओलीले यस्तो बताएका हुन् । 

उनले सेवा दिने भन्दा पनि लाभ मात्रै लिने उद्देश्यले प्रवेश गरेका व्यक्तिका कारण सहकारी क्षेत्रमा विकृति नै आएको बताएका छन् । 

‘सहकारी क्षेत्रमा केहीले बदमासी गरेका छन् । ठूलो रकम बिगारेका पनि छन् । तर बिगारेका केहीले हो । सहकारी धेरै छन् तर धेरै बिग्रिएका छैनन् ।’, ओलीले भने, ‘लाभ लिने मात्रै उद्देश्य बोकेर प्रवेश गरेका व्यक्तिका कारण सहकारी क्षेत्रमा विकृति आएको हो । सरकारलाई यो विकृति निर्मूल गर्न तत्पर छ ।’ 

त्यस्तै, ओलीले सहकारीको मर्मअनुसार र नियमसंगत ढंगबाट चलेका सहकारीहरु नडुब्ने र कसैलाई नडुबाउने भन्दै सहकारी क्षेत्रबाट गैरसहकारी तत्वलाई निस्तेज पार्न सरकार सजग रहेको पनि बताएका छन् । उनले सहकारी क्षेत्रका समस्या समाधान गर्ने उपायहरुसमेत समितिले सरकारलाई दिनुपर्ने भन्दै राष्ट्रिय समस्याका रुपमा देखापरेको सहकारी समस्या समाधान गर्न सरकार समितिको प्रतिवेदनको प्रतिक्षामा रहेको पनि उल्लेख गरेका छन् । 

‘समितिलाई हामीले निर्देशन दिने होइन, समितिले सरकारलाई निर्देशन गर्ने हो ।’, ओलीले भने, ‘हामी समितिको रिपोर्ट र सुझावको प्रतिक्षामा छौँ । सहकारीमा देखिएको डरलाग्दो विकृतिलाई अहिलेकै राज्य संयन्त्रबाट छानविन, निराकरण, कारबाही गर्ने की अर्को संयन्त्र बनाउने त्यो पनि तपाईंहरुले नै भन्नुस् ।’