ममता काफ्ले प्रकरणः ब्लुस्टार प्रविधिले देखायो घरभित्र रगतका टाटाहरु, फोटो सार्वजनिक

काठमाडौं । अमेरिकाको भर्जिनियास्थित मनसास पार्कबाट सम्पर्कविहीन भएकी नेपाली ममता काफ्लेको घरभित्रका केही तस्वीरहरु सार्वजनिक भएका छन् ।

अदालतमा शव लुकाएको आरोपमा भएको सुनुवाइका क्रममा अदालत समक्ष पेश गरिएको तस्वीरहरु सार्वजनिक भएको हो ।

ममता बेपत्तामा श्रीमान् नरेश भट्टको हात रहेको भन्दै मनसास पार्क प्रहरीले भट्टलाई थुनामा लिएर अदालतमा पेश गरेको हो ।

तस्वीरमा कोठाभित्र कार्पेट र बाथरुममा रगतका टाटाहरु देखिन्छन् ।

ममता १५ साउनबाट सम्पर्कविहीन भएकी थिइन् । ७ भदौमा नरेशलाई पक्राउ गरेको थियो । ममतको हत्या र शव लुकाएको उनीमाथि आरोप छ ।

प्रहरीले कोठामा रगत भए नभएको पहिचान गर्न ब्लुस्टार प्रविधि प्रयोग गरेका थिए ।

कोठाभित्र झगडापछि रगक्ताम्ये भएको शरीरलाई बाथरुमसम्म घिसारेर लगेको हुनसक्ने अधिकृतहरुको दाबी छ । अहिले सार्वजनिक भएको कोठा र बाथरुमका तस्वीरहरुले पनि त्यो शंकालाई बल पुर्या‍एको छ ।

पक्राउ परेका भट्ट पक्षका वकिलहरुले भने शरीरबिनै गम्भीर अभियोग लगाइएको भन्दै जमानतमा छाड्न माग गरेका छन् ।

पछिल्लो समय ममताले घरमा आफूविरुद्ध हिंसा भइरहेको भन्दै अफिसका सहकर्मीहरुलाई सुनाएकी थिइन् । अचानक बिना जानकारी उनी अफिस आउन छाडेपछि सहकर्मी प्रहरीमा गएका थिए ।