उद्योग स्थापना गर्न कोरियन व्यवसायी अर्जुनधारामा

झापा, १९ भदौ । झापाको अर्जुनधारा नगरपालिकामा विभिन्न उद्योग स्थापनार्थ कोरियन व्यवसायीसँग बुधबार छलफल भएको छ ।

अर्जुनधारा नगरपालिकासँगको सहकार्यमा नगर क्षेत्रमा उद्योग स्थापनार्थ कोरियन व्यवसायी र नगरपालिकाका जनप्रतिनिधिहरुसँग छलफल भएको हो । नगरपालिकाको सहकार्यमा हाइब्रिड स्कुटर एसेम्बल उद्योग, शृङ्गार सामग्री उद्योग र कृषि मल उत्पादन उद्योग स्थापनाका लागि कोरियन व्यवसायीसँग छलफल भएको नगरप्रमुख बलदेव गोम्देनले बताउनुभयो ।

“अर्जुनधारामा कोरियन कम्पनी स्थापना गर्ने प्रयास गरेका हौं”, उहाँले भन्नुभयो, “त्यसका लागि कानूनी प्रक्रिया पूरा गर्ने काम भइरहेको छ ।” उद्योग स्थापना भए कोरियन उत्पादन सुलभ मूल्यमा पाइनुका साथै रोजगारी र पर्यटन प्रवद्र्धनमा समेत टेवा पुग्ने नगरप्रमुख गोम्देनको भनाइ छ ।

छलफलका क्रममा कोरियाका इभी (विद्युतीय सवारी) का सञ्चालक छाङ्ग हटन सिमले आफ्नो उद्योगले उत्पादन गर्ने सवारी साधनका विषयमा जानकारी दिनुभएको थियो । यस्तै, जुमी युनिर्भस कलेजका प्रोफेसर एवम् शृङ्गार व्यवसायी किमसन खयाङ्गले शृङ्गार सामग्रीका बारेमा आफ्नो प्रस्तुती दिनुभएको थियो भने कृषि व्यवसायी लि च्याङ्ग जेले आफ्नो योजना सुनाउनुभएको थियो ।

प्रतिनिधिसभा सभामुख देवराज घिमिरेको समन्वय र नगर प्रमुख गोम्देनको अग्रसरतामा नगर क्षेत्रमा उद्योग स्थापनाका लागि कोरियाबाट आएका उद्योगीको टोलीसँग छलफल भएको सभामुख घिमिरेका स्वकीय सचिव केशवराज ढुङ्गेलले बताउनुभयो ।

कार्यक्रममा नगर उपप्रमुख खड्गमाया पराजुली लगायतका जनप्रतिनिधि र नगरका विभिन्न संघ–संस्थाका प्रमुख÷प्रतिनिधि उद्योग स्थापनाका विषयमा जिज्ञासा राख्नुभएको थियो ।

The post उद्योग स्थापना गर्न कोरियन व्यवसायी अर्जुनधारामा appeared first on Jhapa Online.