प्रचण्डलाई प्रधानमन्त्री ओलीको प्रश्न – महान् जनयुद्धै थियो भने किन आउनुपर्‍यो शान्ति प्रक्रियामा ?

काठमाडौं । प्रधानमन्त्री केपी शर्मा ओलीले नेकपा माओवादी केन्द्रका अध्यक्ष पुष्पकमल दाहाल प्रचण्डलाई ‘जनयुद्ध महान् नै थियो भने किन छोडेर आएको’ भन्दै प्रश्न गरेका छन् ।

२१ औं निजामती सेवा दिवसको अवसरमा आयोजित कार्यक्रमलाई सम्बोधन गर्दै उनले यस्तो बताएका हुन् ।

ओलीले भने, ‘हाम्रो देशमा हिंसा थियो, त्यसलाई व्यवस्थापन गर्नुपर्‍यो । केही मानिसहरुले त्यसलाई महिमा मण्डन गरेको सुन्छु । त्यस्तो महान थियो भने किन छोडेको त त्यो बाटो ? किन आउनुपर्‍यो शान्ति प्रक्रियामा ? त्यस्तो महान् जनयुद्धै थियो भने त सफल पार्नुपर्दथ्यो । जनयुद्ध भन्ने चिज जनयुद्ध हो भने त्यो फेल हुँदैन । जनआन्दोलन हो भनेपनि त्यो फेल हुँदैन । जुन भइसकेपछि त्यो फेल हुँदैन ।’

उनले हिंसाको महिमा मण्डन नगर्न माओवादी केन्द्रलाई चेतावनीसमेत दिए ।

उनले भने, ‘बाटो बदल्नुपर्छ । मैले पनि झापा आन्दोलनताका जुन नीतिहरु लिएको थिएँ, त्यो सही नीति भएनछ अगाडि बढ्ने, बदलियो । सही भएन त बदल्नुपर्छ । त्यस्तै अरुले चलाएका अनावश्यक हिंसा आदि पनि छोड्नुपर्छ । बदल्नुपर्छ । हिंसाको महिमा मण्डन गरेर हामी अघि बढ्न सक्दैनौँ ।’