उपसभामुख सोध्छिन् : कांग्रेस-एमालेले भन्नेबित्तिकै मैले राजीनामा दिनुपर्ने ?

काठमाडौं । उपसभामुख इन्दिरा रानाले २०७९ फागुन १२ गते शुक्रबारको मिति राखेर नेपालस्थित अमेरिकी दूतावासलाई एउटा पत्र लेखिन् । पत्रमा आफूसहित अन्य पाँच युवालाई समय र भिसा दिलाउन आग्रह गरेका थिए ।

उपसभामुखको लेटरहेडमा लेखिएको उक्त पत्र १७ महिनापछि विवादमा आयो । आपत्तिजनक कुराचाहिँ के भने उपसभामुख रानाको सचिवालयका केही मान्छेले पत्रमार्फत सिफारिस भएका युवाहरूबाट पैसा बुझेको कुरा बाहिर आएको थियो ।

यसपछि दलहरूले उपसभामुख रानाको राजीनामा मात्रै मागेनन्, प्रतिनिधि सभाको राज्य व्यवस्था तथा समितिमा उजुरीसमेत पर्‍यो । तर, पछि त्यो विषय यतिकै सेलायो । तर, त्यसको २ महिनापछि विषयले फेरि एकाएक चर्चा पाएको छ ।

सोमबार साँझ बालुवाटारमा बसेको सत्तारूढ गठबन्धनसम्बद्ध दलहरूको बैठकमा प्रधानमन्त्री केपी शर्मा ओलीले उपसभामुख रानामाथि महाभियोग लगाउन प्रस्ताव गरेपछि यो विषय संसद्सम्मै पुगिसकेको छ ।

कांग्रेसले भन्यो- उपसभामुखले गर्नै नहुने काम गर्नुभयो, राजीनामा दिनुपर्छ

बुधबार बसेको संसद् बैठकमा नेपाली कांग्रेस र नेकपा (एमाले) ले उपसभामुख रानालाई राजीनामा गर्न आग्रह गरेका छन् । कांग्रेसले त पदाधिकारी तथा पूर्वपदाधिकारीको बैठक बसाएरै उनको राजीनामा माग गरेको छ ।

यता एमाले नेता तथा सांसदहरूले पनि उपसभामुख रानाले मार्गप्रशस्त गर्नुपर्ने माग गरिरहेका छन् । सँगै गठबन्धनमा रहेका जनता समाजवादी पार्टी (जसपा), नागरिक उन्मुक्ति पार्टी (नाउपा) लगायतले पनि कांग्रेस-एमालेकै मागलाई समर्थन गरिरहेका छन् ।

यता प्रमुख प्रतिपक्ष दल नेकपा (माओवादी केन्द्र) सहित विपक्षी दलहरू उपसभामुखकै पूर्वदल राष्ट्रिय स्वतन्त्र पार्टी (रास्वपा), नेकपा (एकीकृत समाजवादी) लगायतले भने त्यसको विरोध गरेका छन् । उनीहरूले उपसभामुख राना (Indira rana) ले राजीनामा दिन नपर्ने बताइरहेका छन् ।

तर, सत्तारूढ गठबन्धनसम्बद्ध दलहरूले भने उपसभामुखले राजीनामा दिनैपर्ने अडान राखेका छन् । उपसभामुख रानाले भने कांग्रेस-एमालेले भन्दैमा राजीनामा नदिने अडान कसेका छन् ।

कांग्रेस-एमालेले राजीनामा मागिरहेका छन्, राजीनामा दिनुहुन्छ ? भन्ने नेपालभ्युजको प्रश्नमा उनले प्रतिप्रश्न गरिन्— कांग्रेस-एमालेले राजीनामा माग्यो भन्दै मैले दिनुपर्ने ?

उनले संविधान र कानूनभन्दा माथि कोही नभएको उल्लेख गर्दै आफू कानूनत: चल्ने दाबी गरिन् । “संविधान र कानूनको अधिनमा रहेर काम गर्छु, चल्छु,” उनले भनिन्, “कसैको बहकाउमा चल्दिनँ । राजीनामा दिने वा नदिने सन्दर्भमा समयअनुसार गर्छु ।”

• सम्बन्धित सामग्री

उपसभामुख रानामाथि ‘मानव तस्करी’को आरोप, बाहिरियो अमेरिकी दूतावासमा भिसाका लागि सिफारिस गरेको पत्र