परमाणु भट्टीमा देखिए किम जोङ उन, पश्चिममा व्यापक चिन्ता

काठमाडौं । उत्तर कोरियाली नेता किम जोङ उनले युरेनियम प्रवर्द्धन क्षेत्रको भ्रमण गरेका छन् । शुक्रबार नेता उन परमाणु कार्यक्रम अवलोकन गर्दै गरेको दुर्लभ तस्बीर सार्वजनिक भएको हो ।

पछिल्लो पटक सार्वजनिक भएका तस्बीरहरुले उत्तर कोरियाली नेता किम परमाणु कार्यक्रमको दुर्लभ क्षेत्रमा गएको देखिएको कोरियाको स्थानीय सञ्चार माध्यमलाई उल्लेख गर्दै अन्तर्राष्ट्रिय सञ्चार माध्यमले बताएका छन् ।

शुक्रबार कोरियन सेन्ट्रल न्यूज एजेन्सी(केसीएनए) को रिपोर्ट अनुसार, किमले उज्यालो, स्वच्छ गोदाममा लामो पंक्तिमा रहेका सिलिन्ड्रिकल मेसिनरीहरू भएको ठाउँको भ्रमण गरेका थिए । जुन आणविक अस्त्रका लागि हतियार परमाणु सामग्री उत्पादन गर्न प्रयोग गरिन्छ।

जब उत्तर कोरिया परमाणु हतियार कार्यक्रमलाई तीव्र बनाइरहेको हुन्छ र रुससँग सम्बन्ध बलियो पार्दै गएको हुन्छ, त्यसबखत पश्चिममा व्यापक चिन्ता उत्पन्न भएको देखिन्छ। किमको तस्बीरहरु सार्वजनिक भएसँगै त्यही भएको छ ।

किमको भ्रमणको स्थान र ठ्याक्कै मिति रिपोर्टमा खुलाइएको थिएन । तर केसिएनएका अनुसार उनको निरीक्षणको उद्देश्य स्पष्ट थियो कि परमाणु सामग्रीको उत्पादन बढाउन दीर्घकालीन योजना तयार पार्न उनी लागिरहेका छन् ।

विशेषज्ञहरूले भनेका छन्– तस्बिरहरूले किमलाई सैनिक पोशाकमा रहेका व्यक्तिहरू र सफा सेतो प्रयोगशाला शर्ट लगाएका व्यक्तिहरूसँग देखाइएको छ । यसले उत्तर कोरियाको बढ्दो आणविक आत्मविश्वासलाई प्रमाणित गर्छ ।

किमले हालसालै आणविक हतियार प्रवर्द्धबारे धेरै पटक बोलेका छन्। उत्तर कोरियाको ७६औं वार्षिकोत्सवको अवसरमा किमले देशको परमाणु अस्त्रलाई अत्यधिक विस्तार गर्ने वाचा गरेका थिए।

किमले भनेका छन् – आणविक प्रक्रियाको प्राविधिक क्षमतासँग उनी सन्तुष्ट छन् र अधिक उत्पादनका लागि सेन्ट्रीफ्युजहरूको संख्यामा वृद्धि आवश्यक भएकोमा जोड दिएका छन्।

उत्तर कोरियाली अध्ययनका प्राध्यापक पार्क वोन–गोनले भने – युरेनियम उत्पादन देखाएर, उनीहरूले संसारलाई उत्तर कोरियालाई परमाणु राज्यको रूपमा मान्यता दिनुपर्ने सन्देश पठाइरहेका छन् ।

यो खुलासा उत्तर कोरिया र पश्चिमबीचको तनावका बेला आएको छ, जहाँ अमेरिकासहितका देशहरूले उत्तर कोरियामाथि युक्रेनमा रुसको युद्ध प्रयासमा ठुलो सैन्य सहयोग पुर्‍याएको आरोप लगाइरहेका छन्।