सिम्रिक साकोसको साधारणसभा : पत्रकार र सदस्यलाई सम्मान

बिर्तामोड, २ भदौ । झापाको बिर्तामोडस्थित मुख्य कार्यालय रहेको सिम्रिक बचत तथा ऋण सहकारी संस्थाको १४ औं साधारण सभा सम्पन्न भएको छ ।

आज बिर्तामाड भएको अन्तिम माइन्युट प्रमाणिकरण भेलासँगै संस्थाको साधारणसभा सम्पन्न भएको हो । सो अवसरमा संस्थाले दुई जना पत्रकार, चार जना शेयर र दुई वटा सदस्य सेवा केन्द्रलाई सम्मान तथा पुरस्कृत गरेको छ ।

संस्थाले पत्रकार विष्णु पौडेल र प्रदीप परियारलाई नगद १० हजार रुपैयाँ सहित सम्मान गरेको हो । त्यस्तै, संस्थामा उत्कृष्ट कारोबार गर्ने कमल पाण्डे, अजस साह, विरबहादुर राई र फुलमाया तामाङलाई सम्मान गरेको छ भने उत्कृष्ट सेवा केन्द्रका रुपमा सदस्य सेवा केन्द्र धुलाबारी र मधुमल्लालाई नगद रू १५ हजार सहित सम्मान गरेको छ ।

कार्यक्रममा प्रमुख अतिथि बिर्तामोड नगरपालिकाकी नगरप्रमुख पवित्रा महतारा प्रसाईं, संस्थाका अध्यक्ष सुवास भट्टराई, कार्यकारी प्रमुख कमलबहादुर बस्नेत लगायतले सम्मानित एवम् पुरस्कृतहरुलाई सम्मान पत्र हस्तान्तरण गर्नुभएको थियो ।

कार्यक्रममा शुभकामना मन्तव्य राख्नुहुँदै नगरप्रमुख प्रसाईंले सहकारी संस्थाले एउटा सदस्यबाट लिएको बचत अर्को सदस्यलाई ऋण दिने भएकाले अपवाहको पछि नलागी लिएको ऋण तिर्नुपर्नेमा जोड दिनुभयो । उहाँले सहकारी संस्थाहरु धेरै भएकाले पनि समस्या हुने गरेको बताउँदै सहकारी संस्थाहरु मर्ज गर्नुपर्ने धारणा राख्नुभयो ।

संस्थाका अध्यक्ष भट्टराईले वार्षिक प्रतिवेदन प्रस्तुत गर्नुभएको कार्यक्रममा झापा जिल्ला सहकारी संघका सञ्चालक समिति सदस्य केशव बस्नेत, पत्रकार महासंघ झापाका उपाध्यक्ष केशव भट्टराई शुभकामना मन्तव्य राख्नुभएको थियो ।

संस्थाका कार्यकारी प्रमुख कमलबहादुर बस्नेतले स्वागत मन्तव्य राख्नुभएको कार्यक्रमको सञ्चालन संस्थाका कर्जा विभाग प्रमुख विजय बस्नेतले गर्नुभएको थियो । कार्यक्रममा सात वटा इकाइगत साधारणसभाबाट उपस्थित भएका सदस्यहरुले माइन्युट प्रमाणिकरण गर्नुभएको थियो ।

The post सिम्रिक साकोसको साधारणसभा : पत्रकार र सदस्यलाई सम्मान appeared first on Jhapa Online.