अन्तर विश्वविद्यालय फर्मा हाजिरी जवाफ सम्पन्न

कास्की ।

नेपाल फर्मास्यूटिकल एसोसियसन, गण्डकी प्रदेशको आयोजनामा गण्डकी प्रदेश स्तरीय फर्मा हाजिरी जवाफ प्रतियोगिता सम्पन्न भएको छ। बुधबार गण्डकी विश्वविद्यालयको सभाहलमा विश्व फार्मासिष्ट दिवस (सेप्टेम्बर २५)को पूर्व सन्ध्यामा अन्तर विश्वविद्यालय स्तरीय फर्मा हाजिरी जवाफ प्रतियोगिता आयोजना गरिएको नेपाल फर्मास्यूटिकल एसोसिएसन गण्डकी प्रदेशका अध्यक्ष प्रकाश पौडेलले बताए।

एसोसिएसनका अध्यक्ष एवं गण्डकी विश्वविद्यालयका फार्मेसी कार्यक्रम संयोजक वरिष्ठ फार्मेसिस्ट प्रकाश पौडेलको अध्यक्षता, गण्डकी विश्वविद्यालयका कुलपति प्रा.डा. गणेशमान गुरुङको प्रमुख आतिथ्यतामा सम्पन्न कार्यक्रममा पोखरा विश्वविद्यालयका स्वास्थ्य विज्ञान संकायका डिन डा. अमर नागिला, गण्डकी प्रदेश एकेडेमी अफ साईन्स एण्ड टेक्नोलोजी (GPAST) का कार्यकारी निर्देशक डा. ढाकाराम भण्डारी, नेपाल फार्मेसी परिषद्का सदस्य अमृत थापालगायत विश्वविद्यालयका प्राध्यापक तथा विधार्थीहरुको उल्लेख उपस्थिति रहेको थियो ।

विश्वविद्यालयमा औषधी विज्ञानमा स्नातक तह अध्ययन गर्दै गरेका ४ वटा विश्व विद्यालय पोखरा विश्व विद्यालय, गण्डकी विश्व विद्यालय, त्रिभुवन विश्व विद्यालयको गण्डकी मेडिकल कलेज, पूर्वाञ्चल विश्व विद्यालयको नोबेल एकेडेमी सहित ७ वटा समूहहरूको सहभागी भएको प्रतियोगितामा पोखरा विश्व विद्यालयको समूह ‘क’ प्रथम भएको थियो भने पोखरा विश्व विद्यालयकै समूह ‘ख’ दोस्रो र गण्डकी विश्व विद्यालयको समूह ‘ख’ तृतीय भएको थियो ।

विजेता समूहहरूले नगद पुरस्कार सहित प्रमाणपत्र प्राप्त गर्नुका साथै विजेता पोखरा विश्वविद्यालयले यो वर्षको रनिङ्ग सिल्ड आफ्नो नाममा पारेको छ। जिपास्ट (GPAST), चोक फर्मा प्रा.ली., द साईन्स हाउस (The Science House), मेडि टच स्किन एण्डहेयर क्लिनिक (Medi Touch Skin and Hair Clinic) लगायतको आर्थिक सहयोग रहेको थियो।

अध्यक्ष पौडेलले नेपालमै पहिलो पटक फार्मेसी विषयमा रहेर विश्वविद्यालय स्तरीय फर्मा क्विज कन्सेट आयोजना भएको र नेपाल फर्मास्यूटिकल एसोसिएसन गण्डकी प्रदेशले आफ्नो स्थापना पश्चात् फार्मेसी पेसामा रहेका विभिन्न विषयमा काम गरिरहेको बताउँदै फार्मासिष्टको हक हित र संरक्षणमा नेपाल फर्मास्यूटिकल एसोसिएसन सधैँ प्रतिबद्ध रहेको पनि जनाए।