ऊर्जामन्त्रीको स्पष्टीकरणबारे कुलमान : मन्त्रालयका सचिवसहितको बैठक हो, सबै काम सल्लाहमै भएको छ

काठमाडौं । आफूलाई ऊर्जामन्त्री दीपक खड्काले पछिल्लो पटक सोधेको स्पष्टीकरणबारे नेपाल विद्युत प्राधिकरणका कार्यकारी निर्देशक कुलमान घिसिङले प्रतिक्रिया दिएका छन् ।

कार्यकारी निर्देशक घिसिङले मन्त्री खड्का र मन्त्रालयका सचिव लगायतका उच्च अधिकारीहरूसँगको सल्लाहमै भारतीय पक्षसँगको बैठकमा निर्णय र हस्ताक्षर भएको प्रष्ट्याएका छन् ।  

मन्त्री खड्काले कुलमानलाई नेपाल-भारत द्विपक्षीय विद्युत विनिमय समितिको बैठकमा उपस्थित भएर किन हस्ताक्षर गरेको भन्दै स्पष्टीकरण सोधेका थिए । 

उक्त बैठक यही फेब्रुअरी १२ तारिखमा भारतको राजधानी नयाँ दिल्लीमा भएको थियो । 

घिसिङले  त्यसबेला मन्त्री खड्का पनि भारतमै रहेको र सबै काम सल्लाहले नै भएको बताए । उक्त बैठकमा मन्त्रालयका सचिव समेत सहभागी रहेको उनले बताए । 

घिसिङले भने, ‘नेपाल भारत विद्युत विनिमयको बैठकमा मन्त्रालयका सचिव नै सहभागी थिए । त्यसैले कुन निकायको स्वीकृति लिएको भन्ने प्रश्न नै उठ्दैन, मन्त्रीज्यू पनि त्यो बेला दिल्लीमै हुनुहुन्थ्यो । सबै काम सल्लाहमै भएका छन् । मन्त्रालयका सचिव नै सहभागी भएको बैठकले गरेका निर्णयको स्वामित्व देशकै हुन्छ होला । ‘ 

मन्त्री खड्काले कुलमानलाई सोधेको यो तेस्रो स्पष्टीकरण हो । उनले आफूलाई सोधिएको पछिल्लो स्पष्टीकरणको जवाफ पनि समयभित्रै दिने जानकारी दिए । 

यो पनि पढ्नुहोस :

सबै काम छाडेर कुलमानको पछि लाग्दै ऊर्जामन्त्री खड्का, हटाउने नियतले फेरि सोधे स्पष्टीकरण