शिवसताक्षीमा भव्य तीज कार्यक्रम

शिवसताक्षी, १५ भदौ । झापाको शिवसताक्षी वडा नं. ४ का दिदीबहिनीहरुले तीज मनाएका छन् । शिवसताक्षी नगरपालिका वडा न ४ को आयोजनामा रंगेयाथन बजारमा आज भव्य रुपमा तीज कार्यक्रम गरिएको हो ।

तीज कार्यक्रमको उद्घाटन झापा क्षेत्र नं. ४ का संघीय सांसद एलपी साँवा लिम्बुले गरेका छन् । उद्घाटनका क्रममा बोल्दै सांसद साँवाले नेपाल सांस्कृतिक धार्मिक पर्वहरुको धनी रहेको बताए । हरितालिका तीजलाई मौलिक पर्वको रुपमा विकास गर्दै आफ्नो गच्छे अनुसार मनाउन सांसद साँवाले सबैलाई शुभकामना दिएका थिए । यो पर्व एउटा संस्कृतिसँग जोडिएको छ । अहिले पहिलेको जस्तो दुःख छैन । उनले भने, त्यसैले त यस्ता सांस्कृतिक पर्वहरु सहज तरिकाले सामुहिक मनाउने प्रचलन बढ्दै गएको छ । यो सकारात्मक पक्ष हो ।

त्यस्तै शिवसताक्षी नगरपालिकाका नगर प्रमुख मेगाहाङ्ग थोप्राले मानिसको अवस्था फेरिएसँगै परिस्थितिले साथ दिदा आज यति ठूलो समूहमा सांस्कृतिक पर्व मनाउन पाएको बताए । पहिले माइतीहरुले आफ्ना दिदीबहिनीहरुलाई बोलाएर घरमा भेला भई तीज मनाउने चलन थियो । तर आज यसरी सामुहिक रुपमा तीज कार्यक्रम मनाएर सबै जाति भाषा, धर्मालम्बीहरुले साझा पर्वको रुपमा मनाउन थालिएको जानकारी दिए । तीज पर्वलाई एउटा सभ्य र तडभडक नगरीकन मनाउन सुझाउँदै सबैलाई शुभकामना दिएका थिए ।

वडाध्यक्ष विष्ण्ुा प्रसाईले वडाका सबै महिला दिदीबहिनीहरुलाई एक अर्काप्रति आत्मियता बढाउन एकै ठाउँमा भेला गरी तीजको कार्यक्रम राखिएको जानकारी दिए । उनले नेपाली नारीहरुको चाडलाई भव्य रुपले मनाउन सबैलाई आग्रह गरेका थिए । कार्यक्रममा शिवसताक्षी नगरपालिकाका प्रशासन प्रमुख डिल्ली नेपाल, समाजसेवी निशा लिम्बु लगायतले शुभकामना राखेका थिए ।

कार्यक्रममा आउने सबै महिला दिदीबहिनीहरुलाई दरको रुपमा खिर पकाएर खुवाइएको थियो भने, करिब ५ सय महिला दिदीबहिनीहरुको उपस्थिति रहेको थियो ।

The post शिवसताक्षीमा भव्य तीज कार्यक्रम appeared first on Jhapa Online.