बच्चा जन्माउने योजना बनाउँदै हुनुहुन्छ ? यी कुरामा दिनुहोस् ध्यान

काठमाडौं । आजभोलि धेरै दम्पत्तीमा बच्चा नहुने समस्या विश्वव्यापी रूपमा नै बढ्दै गएको छ । बच्चा नभएको कारण धेरै दम्पत्ती चिन्तामा छन् । यसको मुख्य कारणहरूमा खराब जीवनशैली, प्रदूषण, तनाव, ढिलो विवाह गर्ने प्रवृत्ति र रासायनिक पदार्थहरूको बढ्दो प्रयोग हो ।

पुरुषहरूमा शुक्राणुको गुणस्तर र सङ्ख्यामा कमी आउनु र महिलाहरूमा अण्डाशयको समस्या हुनु प्रमुख चिकित्सकीय कारणहरू हुन् । यदि तपाईं पनि बच्चाको जन्माउने योजना बनाउँदै हुनुहुन्छ भने मानसिक रूपमा धेरै प्रकारका तयारीहरू आवश्यक हुन्छन् ।

के कुरामा ध्यान दिने ?

राम्रो निद्रा लिनुहोस्

यदि तपाईं छिटो गर्भधारण गर्न चाहनुहुन्छ भने राम्रो निद्रा लिनुहोस् । दैनिक ६ घण्टा भन्दा कम वा ९ घण्टा भन्दा बढी सुत्नाले गर्भधारणको सम्भावना २५ प्रतिशत कम हुन्छ । त्यसैले सुनिश्चित गर्नुहोस् कि तपाईं दैनिक ६–८ घण्टाको राम्रो निद्रा लिनुहुन्छ ।

एल्युमिनियम र नन–स्टिक भाँडामा खाना नपकाउनुहोस्

एल्युमिनियम र नन–स्टिक भाँडामा खाना पकाउने, प्लास्टिकको बोतलबाट पानी पिउने र प्लास्टिकको भाँडामा खाजा र खाना राख्नबाट बच्नुहोस् । यीबाट निस्कने रासायनहरूले केही हदसम्म हर्मोनल सन्तुलनलाई असन्तुलित गरेर प्रजनन क्षमतालाई प्रभाव पार्छन् ।

एकसाथ समय बिताउनुहोस्

दुवैले कम्तीमा ३० मिनेट एकसाथ बिताउनुहोस् र त्यस्ता कुराहरू गर्नुहोस् जुन तपाईंलाई मनपर्छ । जस्तै – एकसाथ योग, प्राणायाम, ध्यानको अभ्यास गर्ने वा भविष्यमा बच्चाको बारेमा कुरा गर्नाले गर्भधारणको सम्भावनालाई राम्रो बनाउन मद्दत गर्छ ।

आफ्नो फिटनेसमा ध्यान दिनुहोस्

यदि तपाईंको तौल बढी छ भने त्यसलाई नियन्त्रण गर्नुहोस् । दैनिक कम्तीमा ३० मिनेट व्यायाम गर्नुहोस् । हिँड्ने, जगिङ गर्ने, दौडने, योग गर्ने, स्ट्रेचिंग , साइकल चलाउने, पौडी खेल्ने आदि जस्ता क्रियाकलाप गर्नुहोस् ।

यी कुराहरू सेवन गर्नुहोस्

अनार, एभोकाडो, आँप, जामुन, केरा, नरिवल – यीमध्ये कुनै पनि फल हप्तामा २–३ पटक खानुहोस् । आहारमा नियमित रूपमा भुटेको फर्सी र सूर्यमुखीको बीज पनि समावेश गर्नुहोस् ।

मदिरा र चुरोटबाट टाढा रहनुहोस्

धुमपान, मदिरा र क्याफिनको सेवनबाट बच्नुहोस् किनभने यी सबैले प्रजनन क्षमतालाई प्रभाव पार्छन् । त्यसैगरी पुरुषहरूले आफ्नो पाइन्टको खल्तीमा फोन राख्नबाट बच्नुपर्छ । यसले शुक्राणुको गुणस्तरलाई प्रभाव पार्न सक्छ ।

पुरुष र महिला दुवैको लागि

ब्युँझेको पहिलो ३० मिनेट र सुत्नु अघिको अन्तिम ३० मिनेटसम्म मोबाइल, टिभी, ल्यापटप जस्ता सामाग्रीको प्रयोग नगर्नुहोस् । यसले कोर्टिसोल कम गर्छ र मेलाटोनिनको स्रावलाई राम्रो बनाउँछ जसले अण्डाको गुणस्तर सुधार गर्न मद्दत गर्छ ।

ढिलो विवाह एक समस्या हो ?

ढिलो विवाह पनि बच्चा नहुनुको एक कारण हुन सक्छ । विशेषगरी महिलाहरूमा ३५ वर्ष पछि गर्भधारणको सम्भावना क्रमशः घट्दै जान्छ । पुरुषहरूमा पनि उमेरसँगै शुक्राणुको गुणस्तर र गतिशीलतामा कमी आउन सक्छ । उमेर बढ्दै जाँदा मधुमेह, उच्च रक्तचाप जस्ता समस्याहरूको जोखिम बढ्छ, जसले गर्भधारणमा समस्या ल्याउन सक्छ ।

यद्यपि, यो कुरा पनि ध्यानमा राख्नुपर्छ कि प्रत्येक व्यक्तिको शारीरिक अवस्था फरक हुन्छ । धेरै जोडीहरू ढिलो विवाह गरेर पनि सफलतापूर्वक बच्चा जन्माउँछन् । तर, समग्रमा प्रजनन स्वास्थ्यको दृष्टिकोणबाट हेर्दा उचित उमेरमा विवाह र परिवार योजना बनाउनु फाइदाजनक हुन्छ ।