बिर्तामोडको सिटी सेन्टरमा भदौ २५ देखि जुत्ता मेला

बिर्तामोड, २३ भदौ । नेपालीको महान पर्व दशैं–तिहारलाई लक्षित गरेर झापाको बिर्तामोडमा एक महिने दशैं–तिहार महोत्सव तथा जुत्ता मेला आयोजना हुने भएको छ ।

‘नेपाली उत्पादनको प्रवद्र्धन हाम्रो अभियान’ भन्ने मुख्य नारासहित आगामी भदौं २५ गतेदेखि असोज २४ गतेसम्म बिर्तामोडस्थित सिटी सेन्टरमा मेला आयोजना गर्न लागिएको हो । आज बिर्तामोडमा पत्रकार सम्मेलन गरी सिटी सेन्टर बिर्तामोडको आयोजना तथा बिर्तामोड नेपाली जुत्ता घरको सह–आयोजनामा जुत्ता मेला आयोजना बारे जानकारी दिइएको छ ।

बडा दशैंलाई लक्षित गरेर महोत्सवको आयोजना गरिएको आयोजक संस्थाका दिपेन्द्र राउतले जानकारी दिनुभयो । स्वदेशमा उत्पादित जुत्ता चप्पल आम उपभोक्तामाझ पुर्याई स्वदेशी वस्तु नै प्रयोग गर्ने भावनाको विकास गराउनु महोत्सवको मुख्य उद्देश्य रहेको आयोजक समितिका संयोजक होमनाथ उपाध्ययले बताए ।

संयोजक उपाध्ययका अनुसार महोत्सवमा पाँच वटा कम्पनीका २५ स्टल रहने छन् । महोत्सवमा बीएफ डियर हिल, फस्ट वाक सुज, रन सुज, स्मार्ट सुज, क्रस रोड सुज गरी ५ वटा कम्पनीका १० भन्दा बढी ब्राण्डका तीन हजारभन्दा बढी मोडलका जुत्ताहरु उपलब्ध हुने छन् ।

मेलामा एक लाख जनाले अवलोकन गर्नुका साथै दुई करोड रुपैयाँको कारोबार गर्ने लक्ष्य रहेको आयोजक नानीराज घिमिरेले बताउनुभयो । प्रत्येक जुत्ता खरीदमा न्यूनतम् १५ देखि ५० प्रतिशतसम्म छुटको व्यवस्था रहने उहाँले बताउनुभयो ।

गत वर्ष पुस ९ गतेदेखि माघ १५ गतेसम्म सोही स्थानमा आयोजना गरिएको कोशी प्रदेशस्तरीय प्रथम बिर्तामोड जुत्ता चप्पल महोत्सको सफलतासँगै यस वर्ष पनि दशैंलाई लक्षित गरेर महोत्सवको आयोजना गर्न लागिएको जनाइएको छ ।

The post बिर्तामोडको सिटी सेन्टरमा भदौ २५ देखि जुत्ता मेला appeared first on Jhapa Online.