झापामा २८ जना बेसहारा नागरिकको उद्धार

झापा, २४ भदौ । झापाका विभिन्न स्थानबाट २८ जना बेसहारा नागरिकको उद्धार गरिएको छ ।

जिल्लाका विभिन्न स्थानबाट उनीहरुको उद्धार गरिएको मानव सेवा आश्रमका झापा संयोजक खगेन्द्र विश्वकर्माले जानकारी दिनुभयो । उनीहरु हाल मेचीनगरस्थित आश्रममा आश्रय लिएर बसिरहेका छन् ।

सोमबार मात्रै झापाको बिर्तामोड नगरपालिका क्षेत्रबाट एक बृद्धसहित तीन जना बेसाहारा नागरिकको उद्धार गरिएको उहाँले बताउनुभयो । मानव सेवा आश्रमका प्रतिनिधि, बिर्तामोड नगरपालिकाका नगर उपप्रमुख नगेन्द्रप्रसाद संग्रौला, नगर प्रहरी लगायतको टोलीले उनीहरुको उद्धार गरिएको हो ।

बिर्तामोड–४ बाट ९० वर्षीय छबिलाल तिम्सिना, बिर्तामोड–३ बाट १८ वर्षीय उजित सिं र बिर्तामोड–६ बाट २२ वर्षीया विनिशा गौतमको उद्धार गरिएको छ । बृद्ध तिम्सिना लामो समयदेखि बिरामी अवस्थामा त्यहाँस्थित कटेरोमा सुतेको अवस्थामा फेला परेका थिए ।

बिर्तामोडको सैनिकमोड स्थित एक निर्माणाधीन घरमा रात कटाउँदै आएका सिंको मानसिक सन्तुलन ठिक नभएको र कहिले काँकरभिट्टा, कहिले गरामनी र कहिले भारतको पानीट्ङकी घर बताउने गरेका छन् ।

उद्धार गरिएकी गौतमको समेत मानसिक सन्तुलन ठीक छैन भने बिर्तामोडको बुट्टाबारी नजिकै शुभबिहानी टोलबाट उद्धार गरिएकी उहाँले आफ्नो ठेगाना मोरङको गछिया बताउने गर्नुभएको छ ।

उद्धार गरिएका सबैलाई बिर्तामोड नगर प्रहरीको गाडीमा राखेर मानव सेवा आश्रम मेचीनगर पठाइएको छ । नगर उपप्रमुख नगेन्द्र प्रसाद संग्रौलाले नगर क्षेत्रमा बेसहारा नागरिक भेटिए उद्धार गरिने भएकाले जानकारी गराउन आग्रह गर्नुभयो ।

The post झापामा २८ जना बेसहारा नागरिकको उद्धार appeared first on Jhapa Online.