पठाओ चालकले भेट्टाइदिए अमेरिकाबाट आउँदा बेपत्ता भएका भनिएका दण्डपाणिलाई

काठमाडौं । अमेरिकाबाट काठमाडौं आउँदा त्रिभुवन अन्तर्राष्ट्रिय विमानस्थलबाटै हिजोराति बेपत्ता भएका एक व्यक्ति भेटिएका छन् ।

पर्वतको पैंयू गाउँपालिका–१ घर भएका ७६ वर्षीय दण्डपाणि भुसाल एकान्तकुनामा भेटिएका ज्वाइँ मधु वस्तीले जानकारी गराएको गौशाला प्रहरीले जनाएको छ ।

भुसाल हराएको भन्दै आफन्तले प्रहरी वृत्त गौशालामा जाहेरी समेत दिएका थिए ।

आइतबार बिहान भुसाल तीनकुनेमा भेटिएका थिए । उनी हिँडिरहेको देखेपछि एक अफलाइन पठाओ चालकले कहाँ जाने भन्दै सोधेका थिए । भुसालले आफू छोरीको घर जानु पर्ने बताएका थिए ।

ती पठाओ चालकले सोधखोज गर्ने क्रममा भुसालले शनिबार रातिदेखि हराएको बताएका थिए । भुसालकै मोबाइलमा छोरीको नम्बर भेटिएपछि पठाओ चालकले नै सम्पर्क गरेर खबर गरेको ज्वाइँ वस्तीले बताए ।