माओवादीले भन्यो- प्रधानमन्त्रीबाहेक कसैलाई बोल्न दिँदैनौँ

काठमाडौं । प्रमुख प्रतिपक्ष दल नेकपा (माओवादी केन्द्र) ले संसद्‌मा प्रधानमन्त्रीबाहेक कसैलाई बोल्न नदिने बताएको छ ।

सोमबार दिउँसो १ बजे प्रतिनिधिसभा बैठक बस्दैछ । बैठकमा प्रधानमन्त्री केपी शर्मा ओलीबाहेक अरु कसैलाई बोल्न नदिने माओवादीको अडान छ ।

माओवादी सांसद देवेन्द्र पौडेलले भने, “प्रधानमन्त्रीलाई बोल्न दिन्छौँ, त्यसबाहेक अरुलाई दिँदैनौँ । त्योभन्दा पहिले हामीले बोल्न समय माग्छौँ । सभामुखले कसरी चलाउनुहुन्छ, हेर्छौँ ।”

माओवादीले एमाले सांसद योगेश भट्टराईले बोलेको ‘माओवादी हिंसा’ शब्द संसद्को रेकर्डबाट नहटेसम्म संसद् चल्न नदिने चेतावनी दिएको छ ।

तर, प्रधानमन्त्री ओलीलाई भने बोल्न दिने सांसद पौडेलले बताए । “उहाँ संयुक्त राष्ट्रसङ्घको महासभामा सहभागी हुनका लागि जाने हो, त्यसैले उहाँलाई बोल्न दिन्छौँ,” उनले भने ।

यसअघि भदौ १२ गते एमाले सांसद भट्टराईले माओवादी जनयुद्धलाई ‘हिंसा’ भनेका थिए । त्यसलगत्तै माओवादी सांसदहरूले उक्त शब्द रेकर्डबाट हटाउन माग गरेका थिए । त्यसमा सभामुख देवराज घिमिरेले आफूले निर्णय गरेर सुनाउने बताएका थिए ।

यसपछि गत २८ गते बसेको बैठकमा आफूले प्रशस्त छलफल गर्दा सांसद भट्टराईले बोलेको हिंसा शब्द संसद्को रेकर्डबाट हटाउन नपर्ने निष्कर्ष सभामुख घिमिरेले सुनाएका थिए । यसलगत्तै माओवादी सांसदहरूले उठेर संसद् अवरुद्ध गरे, फलत: २८ गतेको बैठक स्थगित भएको थियो ।

यसपछि आइतबार बस्ने भनिएको बैठक बस्न सकेन । माओवादीले अवरुद्ध गर्ने चेतावनी दिएपछि सूचना टाँस गरी स्थगित गरिएको थियो ।

यसपछि आज बैठक बस्दैछ । आजको बैठकमा प्रधानमन्त्री ओलीले सम्बोधन गर्नेछन् । यसपछि आजै संसद्को बजेट अधिवेशन अन्त्य गर्ने तयारी गरिएको छ ।

• सम्बन्धित समाचार

संसद्को बजेट अधिवेशन आजै अन्त्य गरिने