बिर्तामोडमा किताब मेला : एकैथलोमा नौसय बढी किताब

बिर्तामोड, ४ असोज । झापाको बिर्तामोडमा असोज ७ गतेदेखि किताब मेला लाग्ने भएको छ ।

‘दशैंको कोसेली किताब’ भन्ने नाराका साथ असोज ७ देखि २३ गतेसम्म किताब मेला लाग्ने भएको हो । वीरता रिडर्सको आयोजनामा किताब मेला लाग्ने भएको हो । किताब मेलामा साहित्य पत्रकार मञ्च बिर्तामोड र झापाली साहित्य समाजको सहकार्य रहेको छ भने स्टल व्यवस्थापन इशा बुक्स एण्ड स्टेसनरी बिर्तामोडले गर्ने भएको छ ।

विशेषगरी पठन संस्कृतिको विकास गर्ने उद्देश्यले पाठकलाई लक्षित गरी गरेर किताब मेला आयोजना गर्न लागिएको किताब मेलाका संयोजक सन्तोष आचार्यले जानकारी दिनुभयो । “आफ्ना कृतिहरुलाई पुस्तकाकार गरेर किताब निकाल्ने क्रम बढेको छ”, उहाँले भन्नुभयो, “मेलाको माध्यमबाट पुस्तकहरुलाई पाठकमाझ पु¥याउने लक्ष्य छ ।”

साहित्य पत्रकार मञ्च झापा अध्यक्ष तीर्थ सिग्देलले मेलामार्फत पाठक र लेखक बीच अन्तरंग गराउने बताउनुभयो । “पाठकले सोझै लेखक, साहित्यकारहरुसँग सवाल जवाफ गर्न पाउने व्यवस्था गरेका छौं”, उहाँले भन्नुभयो, “लेखकका कुरा र पाठकका चाहना एकआपसमा साटासाट गर्ने उद्देश्य पनि हो ।”

किताब मेलाका स्टल व्यवस्थापनकर्ता इशाबुकका सञ्चालक केशव मैनालीले मेलामा नौ सय भन्दा बढी पुस्तक प्रदर्शनीमा राखिने बताउनुभयो । एक सयभन्दा बढी झापाली स्रष्टा–सर्जकको कृति (पुस्तक) मेलामा राखिने छ ।

“मानिसले पढ्न चाहेर पनि नभेटेका पुस्तकलाई पनि समावेश गर्ने कोसिस छ”, उहाँले भन्नुभयो, “नयाँ र पुराना सबै प्रकारका किताब राखिने छ ।” पुस्तक मेलामा विशेषगरी नेपाली र अंग्रेजी पुस्तक प्रदर्शनी र बिक्रीका लागि राखिने भने भने केही संस्कृत भाषाका समेत पुस्तक रहने आयोजकले जनाएको छ । मेलामा पुस्तक अनुसार १० देखि ३० प्रतिशतसम्म छूटको व्यवस्था गरिएको आयोजकले जनाएको छ ।

The post बिर्तामोडमा किताब मेला : एकैथलोमा नौसय बढी किताब appeared first on Jhapa Online.