झापामा सशस्त्रले समात्यो पाँच सय बढी पशु चौपाया

झापा, ११ भदौ । झापामा पछिल्लो छ महिनाको अवधिमा पाँच सयभन्दा बढी पशु चौपाया नियन्त्रणमा लिइएको छ ।

झापाका सीमा क्षेत्रबाट गत फागुन १ गतेदेखि भदौ ५ गतेसम्मको अवधिमा पाँच सय नौ वटा पशु चौपाया नियन्त्रणमा लिइएको सशस्त्र प्रहरी बल नेपाल २ नम्बर गण झापाका डिएसपी सुमन पोखरेलले जानकारी दिनुभयो ।

उहाँका अनुसार सशस्त्र प्रहरी बल नेपाल नम्बर २ गण झापा र मातहतका गुल्म र बिओपीले पाँच सय दुई वटा गाईगोरु र सात वटा राँगाभैँसी नियन्त्रणमा लिइएको छ । “सीमा क्षेत्रमा सक्रियाता बढाएका छौं”, उहाँले भन्नुभयो, “अवैध रुपमा भारत लैजान खोजिएका पशु चौपाया नियन्त्रणमा लिएर भन्सार बुझाइएको छ ।”

सीमा नाकाबाट अवैध रूपमा भारततर्फ लैजान खोजिएका ती पशु चौपाया नियन्त्रणमा लिएर रू २४ लाख चार हजार राजस्व संकलन भएको उहाँले बताउनुभयो । गत फागुन १ गतेदेखि भदौ ५ गतेसम्म मात्र गाईगोरुबाट रू २२ लाख ३५ हजार र राँगाभैँसीबाट रू एक लाख ६५ हजार रुपैयाँ बराबरको राजस्व संकलन भएको हो ।

जिल्लाका विभिन्न सीमा नाकाबाट चोरी–तस्करी बढ्न थालेपछि सक्रियता बढाएको र सीमा क्षेत्रमा हुने अवैध गतिविधि नियन्त्रणका लागि २४ घण्टा सशस्त्र प्रहरी परिचालन गरिएको डिएसपी पोखरेलले बताउनुभयो ।

The post झापामा सशस्त्रले समात्यो पाँच सय बढी पशु चौपाया appeared first on Jhapa Online.