बाइडेन प्रशासनले कोभिडसम्बन्धी पोस्ट हटाउन दबाब दियो – जुकरबर्ग

काठमाडौं । मेटाका मालिक मार्क जुकरबर्गले बाइडेन प्रशासनले आफूलाई कोभिडसँग सम्बन्धित पोस्टहरू हटाउन दबाब दिएको बताएका छन् ।

जुकरबर्गले अमेरिकी सदनको न्यायिक समितिलाई लेखेको पत्रमा यस्तो उल्लेख छ । मेटा मूल कम्पनी हो र फेसबुक, व्हाट्सएप र इन्स्टाग्राम सहायक कम्पनी हुन् ।

जुकरबर्गले भने, ‘सन् २०२१ मा महिनौंसम्म व्हाइट हाउसका वरिष्ठ अधिकारीहरूले हामीलाई कोभिड-१९ सम्बन्धित सामग्री सेन्सर गर्न बारम्बार दबाब दिए । यसमा व्यंग्यसँग सम्बन्धित सामग्री पनि समावेश थियो । जब हामी यसमा सहमत भएनौं, हाम्रो टीमहरूप्रति निराशा व्यक्त गरियो।’

उनले सामग्री हटाउने वा नहटाउने हाम्रो निर्णय भएको बताए ।

मार्क जुकरबर्गले पत्रमा भनेका छन्, ‘सरकारले सिर्जना गरेको दबाब गलत थियो भन्ने मलाई विश्वास छ र हामी यस विषयमा बढी मुखर नभएकोमा दुख लागेको छ। मलाई लाग्छ कि हामीले कुनै पनि प्रशासनको दबाबमा आएर हाम्रा सामग्रीको मापदण्ड परिवर्तन गर्नु हुँदैन।’