विमानस्थलमा आफन्तले बिदाइ गर्दा लगाइदिएको खादा किन खोस्छ प्रहरी ?
घर छाडेर विदेश जाँदा परिवार तथा आफन्तले बिदाइ गर्दा लगाइदिएको खादासमेत खोसेको भन्दै सामाजिक सञ्जालमा प्रहरीको आलोचना भइरहेको छ ।
काठमाडौं । त्रिभुवन अन्तर्राष्ट्रिय विमानस्थलमा प्रहरीले यात्रुको खादा खोसेको घटनाले सामाजिक सञ्जालमा व्यापक चर्चा पाएको छ ।
घटनाको सार्वजनिक भिडिओमा विमानस्थलमा सुरक्षामा खटिएका प्रहरीहरूले एक यात्रुले लगाइरहेको खादा खोस्न खोज्छन्, यसपछि यात्रु आफैँले खादा खोल्छन् । जुन अहिले सामाजिक सञ्जालभर भाइरल छ ।
भिडिओमार्फत सार्वजनिक यस घटनाको धेरैले विरोध जनाइरहेका छन् । घर छाडेर विदेश जाँदा परिवार तथा आफन्तले बिदाइ गर्दा लगाइदिएको खादासमेत खोसेको भन्दै धेरैले सामाजिक सञ्जालमा प्रहरीको आलोचना भइरहेको छ ।
भिडिओमा देखिएको घटनाले धेरैको मनोभावनामा आहत पुगेको बुझ्न सकिन्छ । किनकि आम नेपालीको बाध्यता स्वदेशमा रोजगारी नपाएपछि विदेश जानुपर्ने हो । हामीकहाँ आफन्तको बिदाइका बेला खादा लगाउने चलन छ ।
कतिपयले ‘विमानस्थलमा आफन्तले बिदाइ गर्दा लगाइदिएको खादा खोल्नुपर्ने नियम कहिलेबाट आयो ?’ भन्दै प्रश्नसमेत गरेका छन् । फेसबूकमै वरिष्ठ गीतकार राजेन्द्र थापा लेख्छन्, “नेताका लावालस्करलाई केही भन्न नसक्ने, लुरुलुरुपछि लाग्ने अनि एउटा सर्वसधारणमाथि गर्ने तिम्रो व्यवहार यस्तै हो ?”
उनले केही दिनअघि टुँडिखेलमा प्रधानमन्त्री केपी शर्मा ओली र पूर्वप्रधानमन्त्री तथा नेपाली कांग्रेसका सभापति शेरबहादुर देउवाविरुद्ध नाराबाजी गर्दा केहीजना पक्राउ गरिएको घटनालाई समेत जोडेका छन् ।
“पासपोर्ट बनाउनदेखि विमानस्थलको डिपार्चरको गेटसम्म आम नेपालीले यस्तै व्यवहारबाट गुज्रनुपर्छ । अनि जनता आजित हुने अनि असभ्य नारा लगाउँदैन त ? जवाफ देऊ नेपाल प्रहरी,” थापा लेख्छन् ।
कतिपयले लेखेका छन्, ‘विमानस्थलमा प्रत्येक नागरिक हेपिन्छन् । तर, भिडिओ त यो मात्रै सार्वजनिक भयो ।’
त्रिभुवन अन्तर्राष्ट्रिय विमानस्थल प्रहरीका निमित्त प्रमुख एसएसपी डम्बरबहादुर विश्वकर्मा भने खादा-माला खोल्ने नियम नभएको बताउँछन् । “यस विषयमा जानकारी पाएको छौँ । आज बैठक बोलाएको छु,” एसएसपी विश्वकर्माले भने ।
एसएसपी विश्वकर्माका अनुसार यात्रुले विमानस्थलमा डिपार्चरबाट भित्र प्रवेश गर्दा खादाहरू लैजान पाउँदैनन् । विगतमा माइकिङ गरेरै यात्रुलाई जानकारी दिने गरिने भए पनि अहिले छाडिएको बताए । उनले यात्रु र प्रहरी दुवैले आफ्नो व्यवहार सुधार गर्नुपर्ने बताउँछन् ।
विमानस्थल प्रहरीको आचरणमा प्रश्न उठेको यो पहिलो पटक भने होइन । यात्रुमाथि दुर्व्यवहार गरेको घटना त पटक पटक सार्वजनिक भइरहन्छन् । साथै विमानस्थलमा कार्यरत कर्मचारीलाई कुटपिट गरेको घटना यसअघि आएका थिए ।
भद्रगोल विमानस्थलस् सुरक्षा जाँचमा विवाद हुँदा प्रहरीबाटै कुटिन्छन् हाकिम
What's Your Reaction?
