मेचीनगरमा बरामद भएको हात्तीको अंग परीक्षणका लागि पठाइयो

झापा, २५ भदौ । झापाको मेचीनगर–९ मा बरामद गरिएको जंगली हात्तीको अंग परीक्षणका लागि राष्ट्रिय विधि विज्ञान प्रयोगशाला पठाइएको छ ।

हात्तीको अंग हो–होइन विषयको यकिन गर्न प्रयोगशाला पठाइएको डिभिजन वन कार्यालय झापाका सूचना अधिकारी अञ्जना पुरीले जानकारी दिनुभयो । गत बैशाख ४ गते दुवै दाह्रा काटिएको अवस्थामा मेचीनगर नगरपालिका–११ स्थित कालीका सामुदायिक वनभित्र हात्ती मृत फेला परेको थियो । बरामद भएको अंग सोही हात्तीको हो–होइन भन्ने पनि यकिन हुने उहाँले बताउनुभयो ।

सोमबार मेचीनगर–९ का खगेन्द्र चापागाई हात्तीको अंग सहित पक्राउ गरिएको थियो । डिभिजन वन कार्यालय झापा, सब डिभिजन वन कार्यालय धाइजन र इलाका प्रहरी कार्यालय धुलाबारीको संयुक्त टोलीले कोठामा भण्डारण गरेर राखेको अवस्थामा आठ किलोग्राम भन्दा बढी हात्तीको शरीरको विभिन्न भागका अंगसहित पक्राउ गरेको थियो ।

वैदेशिक रोजगारीमा जाने क्रममा रहेका युवालाई छातीमा देखिने दाग हटाउने औषधि भन्दै ती अंगहरुको चुर्ण बनाएर बिक्री गर्ने गरेको प्रारम्भिक अनुसन्धानबाट खुलेको छ । चापागाईलाई आज अदालतबाट म्याद थप गरी थप अनुसन्धान अघि बढाइएको सूचना अधिकारी पुरीले बताउनुभयो ।

झापामा आव २०६७/०६८ देखि हालसम्म २१ वटा हात्तीको मृत्यु भएको छ । जसमा केही हात्तीको अंग चोरी भएको अवस्थामा फेला परेका थिए ।

The post मेचीनगरमा बरामद भएको हात्तीको अंग परीक्षणका लागि पठाइयो appeared first on Jhapa Online.