ग्यालेक्सीबाट रविले एक करोडभन्दा बढी तलब खाँदा जीबीले लिए ३० लाख मात्रै
ग्यालेक्सी फोरके टेलिभिजनबाट रविले एक करोड रुपैयाँभन्दा बढी तलब लिएको खुलेको छ । तर हाल फरार रहेका अध्यक्ष गीतेन्द्रबाबु (जीबी) राईले भने जम्मा ३० लाख मात्र तलब लिएको सहकारी संस्था बचत रकम दुरुपयोगसम्बन्धी विशेष छानबिन समितिको प्रतिवेदनमा उल्लेख छ ।
काठमाडौं । सहकारी छानबिन समितिले गोर्खा मिडियाको कारोबारका सम्बन्धमा रवि लामिछानेले गलत कुरा बताएको निष्कर्ष निकालेको छ ।
समितिमा बयानका क्रममा गोर्खा मिडियाको आर्थिक कारोवारमा जीवी राई नै जिम्मेवार हुने गरेको भनी उनले दिएको बयान गलत रहेको निष्कर्ष छ ।
तर, आर्थिक कारोबार हेर्दा रवि लामिछाने नै कारोवारमा संलग्न रहेको भन्दै समितिले उनको बयान यथार्थपरक नभएको निष्कर्ष निकालेको हो ।
यस्तै गोर्खा मिडिया नेटवर्कद्वारा सञ्चालित ग्यालेक्सी फोरके टेलिभिजनबाट रवि लामिछानेले एक करोड रुपैयाँभन्दा बढी तलब लिएको खुलेको छ ।
तर हाल फरार रहेका अध्यक्ष गीतेन्द्रबाबु (जीबी) राईले भने जम्मा ३० लाख मात्र तलब लिएको सहकारी संस्था बचत रकम दुरुपयोगसम्बन्धी विशेष छानबिन समितिको प्रतिवेदनमा उल्लेख छ ।
लामिछानेले आर्थिक वर्ष २०७८\७९ मा ७४ लाख ३६ हजार ५८७ र त्यसको अघिल्लो आवमा ३० लाख रुपैयाँ तलबबापत लिएका थिए ।
तर राईले भने २०७८\७९ मा मात्र ३० लाख तलब लिएको समितिको प्रतिवेदनमा उल्लेख छ ।
सहकारी ठगीको आरोप लागेका राई हाल फरार छन् भने रास्वपा सभापति लामिछानेले आफू निर्दोष रहेको दाबी गर्दै आएका छन् ।
विभिन्न सहकारीमार्फत गोर्खा मिडियामा ६५ करोड रुपैयाँभन्दा बढी रकम ट्रान्सफर भएको तथ्य समितिले खुलासा गरेको छ ।
गोर्खा मिडिया नेटवर्कमा तलबबापत २ आर्थिक वर्षमा १४ करोड ९३ लाख रुपैयाँभन्दा बढी खर्च भएको छ ।
What's Your Reaction?