विराटनगरमा निकालियो विशाल श्री राधाकृष्ण रथयात्रा, हेलिकोप्टरबाट पुष्पवृष्टि

झापा, ११ भदौ । मोरङको विराटनगरमा विशाला श्री राधाकृष्ण रथयात्रा निकालिएको छ ।

विगतका वर्षमा झैं यो वर्ष पनि विराटनगरको तिन पैनी स्थित राधाकृष्णको मन्दिरबाट विशाल रथयात्रा निकालिएको हो । रथयात्राको कोशी प्रदेशका मुख्यमन्त्री हिक्मतकुमार कार्कीले शुभारम्भ गर्नुभएको थियो । मुख्यमन्त्री कार्कीले रथको विधिपूर्वक पूजाआजा गरेपछि विभिन्न समुदायको झाकी तथा भजन कीर्तनसहित भव्य रुपमा रथयात्रा निकालिएको हो । विगत ९३ वर्षदेखि विराटनगरमा रथयात्रा गरिँदै आएको छ ।

भारतको जगन्नाथपुरीमा निकालिने रथयात्रापछि विराटनगरमा आयोजना हुने राधाकृष्ण रथयात्रा दक्षिण एशियाकै दोस्रो ठुलो रथयात्रा रहेको आयोजक समितिको दाबी छ । आज निकालिएको रथयात्रामा हेलिकोप्टरले पुष्पवृष्टि गरेको थियो ।

राधाकृष्णको युगल जोडीको प्रतिमा राख्न बनाइएको रथको लम्बाइ २२ फिट, चौडाई १४ फिट र उचाई १८ फिट रहेको छ । रथमा अगाडीको दाँयावाँया ७५ फिटको लट्ठा डोरी रहने छ र सो डोरीको माध्यमबाट भक्तजनहरूले रथ तान्ने गर्दछन् । कलात्मक शैलीमा भव्य रूपले रथलाई फुल गुच्छाले सिँगारिएको छ । रथ तान्ने डोरी छुँदा तथा रथको दर्शन गर्दा सबै मनोकामना पुरा हुने धार्मिक विश्वास रहिआएको छ ।

The post विराटनगरमा निकालियो विशाल श्री राधाकृष्ण रथयात्रा, हेलिकोप्टरबाट पुष्पवृष्टि appeared first on Jhapa Online.