झापामा ट्रकमा आगजनी गरेको आरोपमा नागरिक बचाउ महाअभियान झापा संयोजक र सहसचिव पक्राउ

झापा, ८ असोज । झापाको कनकाई नगरपालिका–८ स्थित विरिङ पुलमाथि दुई वटा भारतीय ट्रकमा आगजनी गरेको आरोपमा प्रहरीले आज दुई जनालाई पक्राउ गरेको छ ।

पक्राउ पर्नेमा राष्ट्र राष्ट्रियता धर्म संस्कृति नागरिक बचाउ महा अभियान झापा संयोजक ४० वर्षीय भीम तुम्बापो लिम्बू र सहसचिव ३३ वर्षीय सुरेश चौधरी रहेको जिल्ला प्रहरी कार्यालय झापाका प्रवक्ता प्रहरी नायब उपरीक्षक कृष्णकुमार चन्दले जानकारी दिनुभयो । संयोजक लिम्बू हल्दिबारी–१ घर भई हाल बिर्तामोड–५ मा बस्दै आएका छन् भने चौधरी बिर्तामोड–७ निवासी हुन् ।

भारतको सिलिगुडीबाट प्लाइको फेस पत्ता बोकेर नेपालको सिरहातर्फ जाँदै गरेको यूपी ५७ एटी ४४९३ नम्बरको भारतीय ट्रकमाथि गत असोज ६ गते राति कनकाई–८ स्थित विरिङ खोलाको पुलमा आगजनी गरिएको थियो ।

सोही दिशाबाट मोटरसाइकलमा आएका उनीहरुले ट्रकलाई ओभरट्याक गर्दै प्लाष्टिकको बोतलमा बोकेको आगो बलेको पेट्रोल बोतल (पेट्रोल बम) ट्रकमाथि प्रहार गरेको प्रहरीले जनाएको छ । ट्रकको क्याबिनमा पेट्रोल बम प्रहार गर्दा चालक कुमार महतो समेत घाइते भएका थिए । आगो लागेर घाइतेका चालक भाग्न सफल भए पनि ट्रक जलेर नष्ट भएको थियो ।

सोही दिन बिहानको राति २ः३० बजेको समयमा पुनः बिर्तामोड–६ गिरीबन्धु टी–स्टेटस्थित पूर्व–पश्चिम लोकमार्गमा बिर्तामोडबाट काँकरभिट्टा जाँदै गरेको पोदो रायले चलाएको डब्यूबी ७३ ई ३०५६ नम्बरको भारतीय ट्रकमा उनीहरुले पेट्रोल बम प्रहार गरेको प्रहरीको अनुसन्धानबाट खुलेको छ ।

भारतीय ट्रक र चालकलाई लक्षित गरी आगजनी गरिँदा चालक समेत घाइते भएको प्रहरीले जनाएको छ । आपराधिक उपद्रव र ज्यान मार्ने उद्योगमा झापा जिल्ला अदालतबाट पाँच दिन म्याद थपेर अनुसन्धान अघि बढाइएको प्रवक्ता चन्दले बताउनुभयो । घटनामा संलग्न अन्य फरार प्रतिवादीको खोजी कार्य तीव्र पारिएको उहाँले बताउनुभयो ।

The post झापामा ट्रकमा आगजनी गरेको आरोपमा नागरिक बचाउ महाअभियान झापा संयोजक र सहसचिव पक्राउ appeared first on Jhapa Online.