पत्रकार महासङ्घविरुद्ध रिट : सर्वोच्चले जारी गर्‍यो कारण देखाउ आदेश

काठमाडौं । नेपाल पत्रकार महासङ्घको निर्वाचन निर्धारित समयमा हुन नसकेको बारेमा सर्वोच्च अदालतले कारण देखाउ आदेश जारी गरेको छ ।

सोमबार ध्रुवप्रसाद चौलागाईंले पत्रकार महासङ्घलाई विपक्षी बनाएर रिट निवेदन दायर गराएका थिए । उक्त रिटमा सुनुवाइ गर्दै न्यायाधीश कुमार रेग्मीको एकल इजलासले कारण देखाउ आदेश जारी गरेको हो ।

रिट निवेदनमा ६ महिनाभित्र निर्वाचन गराउन अन्तरिम आदेशको माग पनि गरिएको थियो । महासङ्घको वर्तमान कार्यसमितिले निर्धारित समयमा निर्वाचन गराउन नसकेको भन्दै अब वैकल्पिक माध्यमबाट निर्वाचन गराएर महासङ्घलाई निकास दिन रिट निवेदनमा माग गरिएको छ ।

यसअघि पटक–पटक निर्वाचनको मिति तोकिएको थियो । तर, हुन सकेको छैन । यसपछि निर्वाचित अध्यक्ष विपुल पोखरेलले राजीनामा दिएका छन् । पोखरेलले राजीनामा दिएपछि कार्यवाहक अध्यक्ष बनेका रमेश विष्टले पनि राजीनामा दिइसकेका छन् ।

• सम्बन्धित समाचार

पत्रकार महासङ्घविरुद्ध सर्वोच्चमा रिट, वैकल्पिक माध्यमबाट निकास दिन माग